Бага насны хүүхдүүдийн ном сурах бичиг дээр зүй зохисгүй үг хэллэг их байна гэх гомдол иргэдээс ШӨХТГ-т их иржээ. Үүнтэй холбогдуулаад тус газраас өнгөрсөн 4-5 сарын хооронд нийт 253 ширхэг номын агуулгыг шалгасан байна. Ингэхэд иргэдийн хэлээд буй зөрчилтэй 32 ширхэг ном байсныг хураан авч, үүнээс ноцтой зөрчилтэй 4 ширхэг номыг лангуун дээрээс татжээ. Эдгээр номуудад архидан согтуурах, нэгнээ алж хөнөөхтэй холбоотой ёс бус зүйл орсон байжээ. Мөн номын агуулгад "Хортой мөөг өгч ээжийгээ алдаг, нөхөртөө хортой хоол өгч алдаг. Багшдаа хайртай болж, багш сурагчид нийлээд тамхи татдаг. Хулгай хийгээд баяждаг" гэх үг хэллэг их оржээ.

Улмаар  ШӨХТГ-аас үүнтэй холбоотой санал, хүсэлтээ БСШУЯ-нд тавьсан байна.

Дашрамд хэлэхэд, ШӨХТГ-аас бест селлер номыг долдугаар сарын 1-нээс зарлаж эхлэх юм байна. Урьд нь ашиг, орлоготой номыг тухайн номын дэлгүүр өөрөө зарладаг байсан. Гэвч номын дэлгүүрүүд хэвлэлийн компанитай байдаг учир өөрсдийнхөө хэвлэсэн номыг бест селлертээ дээгүүр тавиад байна гэсэн гомдлыг иргэд хэлдэг аж.