Монгол Улсын Шадар сайд Д.Тэрбишдагвын санаачилсан “Ард түмэн Та-Хаан” форум  Дархан-Уул аймагт “Эрүүл, аюулгүй орчин” сэдвийн дор амжилттай болж өндөрлөлөө.

Форумд Шадар сайдын эрхлэх асуудлын хүрээний Мэргэжлийн хяналтын ерөнхий газар, Онцгой байдал, Худалдан авах ажиллагаа, Стандартчилал, хэмжил зүй, Шударга өрсөлдөөн, хэрэглэгчийн төлөө газрын Дархан-Уул аймаг дахь байгууллага оролцлоо.

Мэргэжлийн хяналтын ерөнхий газрын дарга Д.Батмөнх “Эрүүл, аюулгүй орчинд амьдрах иргэдийн эрх ашгийг нэн түрүүнд тавьж ажиллах нь мэргэжлийн хяналтын байгууллагын үүрэг” сэдвээр илтгэл тавьсан бол аймгийн удирдлагууд орон нутгийнхаа хэмжээнд энэ чиглэлээр хийж хэрэгжүүлсэн ажил, цаашид анхаарах асуудлын талаар танилцууллаа.

Иргэд ямар ус, хүнсний бүтээгдэхүүн хэрэглэдэг, тэдэнд үзүүлж байгаа эрүүл мэнд, боловсрол, нийтийн тээвэр зэрэг төрийн үйлчилгээ стандарт хангаж байгаа эсэхийг сонсож, тулгарч байгаа хүндрэл бэрхшээлийн боломжтойг газар дээр нь шийдвэрлэхийг форум зорилгоо болгосон юм.

Энэ ч үүднээс иргэдийн санал хүсэлтийг сонслоо. Жижиглэнгээр савласан  хүнсний бараа, бүтээгдэхүүн хэмжээнд заасан жиндээ хүрдэггүй, гэр хороололд түргэн, гал командын машин явах аргагүй болтлоо шавааралдсан, гэрэлтүүлэг муу, золбин нохой их, орон сууцны дээврээс ус гоождог тухай иргэд ярьж байлаа. Хотын төвд шинээр тавьсан зам удаж төдөлгүй эвдэрдэг, Дархан-Улаанбаатар чиглэлийн зам их хэмжээний эвдрэлтэй байгааг иргэд хэлж холбогдох яам, байгууллагын сонорт хүргэхийг хүслээ.

Архидалт, үүнтэй холбоотой гарах гэмт хэргийн тоо Дархан-Уулд өссөн байна. Аймгийн Засаг дарга захирамж гарган орон сууцны нэгдүгээр давхарт байрлах 22 дэн буудлыг хааж, архи, согтууруулах ундаагаар үйлчилдэг 500 гаруй дэлгүүрийн тоог цөөлөх бодлого баримталж байгаад иргэд талархаж байв.

Өөрсдөө хаа таарсан газраа хог хаядагаа больчихвол цэвэр цэмцгэр хотод амьдрах бүрэн боломжтой. Бүгдийг төр, засаг руу чихэж болохгүй гэж хэлэх хүн  цөөнгүй байлаа. 100 шахам мянган хүн амтай Дархан-Уул аймаг иргэдийнхээ эрүүл, аюулгүй орчинг бүрдүүлэхээр багагүй зүйл хийж байна. Дэлхийн эрүүл мэндийн байгууллага, Дэлхийн хотуудын холбооноос “Дэлхийн эрүүл хот”  өргөмжлөл авсан нь үүний нэг нотолгоо юм. Орон сууцны  жишиг хороолол барьж дэд бүтцийг нь цогцоор нь шийдсэн, гэр хорооллоо тохижуулж, “Утаагүй Дархан” хөтөлбөр хэрэгжүүлж эхэлсэн гээд олон ололт амжилт байгааг иргэд хэлж байлаа.   

Хяналтын байгууллагатай холбоотойгоор иргэдээс гарсан санал, хүсэлтийг нэг сарын дотор шийдвэрлэж хариу мэдэгдэхийг Мэргэжлийн хяналтын ерөнхий газрын дарга Д.Батмөнх аймгийн Мэргэжлийн хяналтын газарт үүрэг болголоо.  Харин хөрөнгө мөнгө шаардсан томоохон асуудлыг Монгол Улсын Шадар сайдаар дамжуулан төр, засагт хүргэн шийдвэрлүүлнэ гэдгээ амлалаа.