Нийслэлийн гэмт хэргээс урьдчилан сэргийлэх ажлыг зохицуулах зөвлөл Нийслэлийн Засаг даргын Тамгын газар, Хууль Сахиулахын Их сургуультай хамтран нийслэлийн Засаг даргын 2013-2016 оны үйл ажиллагааны хөтөлбөрт тусгагдсан  “Аюулгүй, амгалан Улаанбаатар” зорилтыг хэрэгжүүлэх ажлын хүрээнд “Аюулгүй, амгалан Улаанбаатар ба иргэдийн үүрэг, оролцоо” сэдэвт эрдэм шинжилгээний бага хурлыг зохион байгууллаа. Тус эрдэм шинжилгээний бага хурал 2 үе шаттай болсон бөгөөд хууль, эрх зүйн чиглэлээр ажилладаг албан хаагч, судлаач, оюутнууд оролцсон байна.
Эхний шатад 40 гаруй илтгэл хүлээн авснаас шүүгчид 15 илтгэлийг 2-р шатанд шалгаруулж өнөөдөр оролцогчид илтгэлээ танилцуулж, шилдгүүдийг шалгарууллаа. Оролцогчид Улаанбаатар хотын аюулгүй, амгалан байдлыг хангахад оршин суугчийн үүрэг оролцоо, Биологийн аюулгүй Улаанбаатар-Иргэдийн үүрэг оролцоо, Аюулгүй амгалан Улаанбаатар хот-төр, захиргааны байгууллага, иргэдийн хамтын ажиллагаа зэрэг сэдвийг онцлон олон шинэ санал, санаачилгыг дэвшүүлсэн юм. Эдгээр санал, санаачилгаас шилдгийг шалгаруулж, цаашид ажил болгож хэрэгжүүлэхээр зохион байгуулагчид холбогдох албаныханд зөвлөмж болгон хүргүүлсэн байна.