Монгол Улсын эдийн засгийн өсөлт гурав дахь жилдээ дараалан хоёр оронтой тоонд хадгалагдаж буй. Улс орны эдийн засаг тэлж, хүн амын өсөлт түргэсэхийн хэрээр бүтээн байгуулах хэрэгцээ, хөгжлийн зорилт, цаашид хүрэх зураглал улам бүр боловсронгуй хийгээд өргөн цар хүрээг хамрах шаардлага тулгарч байна. Хөгжлийн зорилтуудыг хангах  дээрх  хэрэгцээ шаардлагатай уялдан улсын нийт хөрөнгө оруулалт, түүний дотор  төсвийн  хөрөнгө оруулалт бүтээн байгуулалтын ажлын  цар хэмжээ тэлж ирлээ. Тодруулбал, Улсын төсвийн хөрөнгө оруулалтын санхүүжилтийн нийт хэмжээ 2005 онд 59 тэрбум төгрөг байсан бол өнөөдөр энэ тоо 20 дахин нэмэгдээд байна.  Төсвийн санхүүжилтээр хийгдэж байсан хөрөнгө оруулалт 2012  оноос эхлэн Хөгжлийн банк болоод “Чингис” бондын санхүүжилтээр өргөжиж, “Гудамж” төсөл, аймгийн төвүүдийг нийслэл хоттой  хатуу хучилттай автозамаар холбох, Хөтөлийн цементийн үйлдвэр, Цагаан суваргын зэс, молибдений үйлдвэр зэрэг олон арван төслийг хэрэгжүүлэх боломж шинээр бүрджээ.

Улс орон даяар хөгжлийн хөрөнгө оруулалт ийн нэмэгдэж буй цаг үеийн шаардлагаас үүдэн Эдийн засгийн хөгжлийн яамнаас “Хөгжлийн хөрөнгө оруулалт” төслийг санаачлан, энэ хүрээнд эхний ээлжинд орон даяар  хэрэгжиж буй улсын төсвийн хөрөнгө оруулалтын хэрэгжилт, гүйцэтгэл, бүтээн байгуулалт хариуцаж буй компаниудын мэдээлэл, шинээр бий болсон ажлын байр, барилга байгууламжид ашиглагдаж байгаа түүхий эд, материалын нийлүүлэлт, үнийн тухай нэгдсэн судалгаа бүхий мэдээллийн сан www.mdi.med.gov.mn вэб сайтыг нээн ажиллуулж байна. Улсын хэмжээнд анх удаа хөрөнгө оруулалтыг төлөвлөлтөөс эхлүүлэн хэрэгжилт,  үр дүнг гартал бүхий л үйл явцыг хянах, бодитоор харах боломж бүхийн энэ сайтаас олон нийт цогц мэдээлэл авах боломжтой юм.

Улмаар Монгол орны 21 аймаг, нийслэлийн  хөрөнгө оруулалт, төлөвлөлт хариуцаж буй 150 гаруй ажилтныг нэг дор цуглуулж, цаг үеийн шаардлага, төсвийн хөрөнгө оруулалтын өнөөгийн байдал, төлөвлөлт, хэрэгжилт, үр дүнг сайжруулах чиглэлээр “Төсвийн хөрөнгө оруулалт” сэдэвт хоёр өдрийн сургалтыг Эдийн засгийн хөгжлийн яамнаас зохион байгуулж байна.

Сургалтын өөр нэг онцлог нь дан ганц төсвийн хөрөнгө оруулалтад найдаж, суурилах биш бүтээн байгуулалтын хөрөнгө санхүүг хувийн хэвшилтэй хамтран бий болгох шинэ хувилбар болох концесс буюу төр-хувийн хэвшлийн түншлэл болоод гадаадын зээл, тусламжийн хөрөнгө оруулалт, өнөөгийн байдлын талаар мэдээлэл сонсож, хэлэлцүүлэг өрнүүлж буй юм. 

“Хөгжлийн хөрөнгө оруулалт” сэдэвт сургалт семинарь хоёр өдөр үргэлжилж, маргааш өндөрлөнө.