УИХ-ын нэгдсэн чуулганаар Үндэсний их баяр наадмын тухай хуульд нэмэлт, өөрчлөлт оруулах тухай хуулийн төслийн хэлэлцэх эсэх асуудлыг хэлэлцлээ.

 УИХ-ын гишүүн Р.Гончигдорж нарын зарим гишүүд уг хуулийн төслийг өргөн мэдүүлж Үндэсний их баяр наадмын тухай хуулиас Далай аварга цолыг хасах саналыг гаргасан юм.
 
Анх 2003 онд Үндэсний их баяр наадмын тухай хуульд далай аварга хэмээх цолыг нэмсэн байна. Уг хуулийн төслийг өргөн барьсан гишүүд үндэсний бөхөд далай аварга хэмээх цол байснаар бөхчүүдийн даян болон дархан аварга цолонд хүрэх боломжийг хааж байна гэж үзэж байгаа аж. Түүнчлэн далай аварга цолыг хассанаар үндэсний бөхийн цолны агуулга болоод бөхчүүдийн нэр хүнд сайжирна гэж хууль санаачлагчид хэлэв.
 
Хэлэлцүүлгийн явцад асуулт асууж, санал хэлэх гишүүд байгаагүй тул дээрх хуулийн төслийг хэлэлцэхийг гишүүдийн олонх нь дэмжлээ. Ингээд уг хуулийн төслийг эцсийн хэлэлцүүлэгт бэлтгүүлэхээр байнгын хороонд буцаалаа. Хэрвээ уг хууль Байнгын хороо болоод УИХ-аар батлагдаж чадвал Улсын аварга А.Сүхбат, Г.Өсөхбаяр нар дархан аварга цолтой болох юм.