2005 онд Засгийн газар тогтоол гаргасны дагуу “Мэргэжлийн хяналтын ажилтны өдөр”-ийг жил бүрийн зургаадугаар сарын хоёрдахь ням гарагт тэмдэглэж ирсэн уламжлалтай. Мэргэжлийн хяналтын байгууллага баярын хурлаа энэ сарын зургааны өдөр хийж, олсон ололт, амжилт, хийж бүтээснээ дүгнэн, цаашдын хөгжлийн зорилтоо тодорхойллоо. 

Хурлыг Монгол Улсын Шадар сайд Д.Тэрбишдагва нээж үг хэлэхдээ Засгийн газрын нэрийн өмнөөс болон хувиасаа баяр хүргэж, ажлын амжилт хүсэв. Тэрбээр улсын байцаагчдын олон талт,  ухаалаг, үр нөлөөтэй, зөв хандлагатай хяналт шалгалтын ачаар чанартай хөрөнгө оруулалт, үр дүнтэй бүтээн байгуулалт хийгдэж,  ард иргэд эрүүл, аюулгүй орчинд амар тайван амьдрах баталгаа бүрдэж байгааг онцлов. Мөн улсын байцаагч хүн эрх мэдэл, албан тушаалаа урвуулан ашиглах, бусдыг айлгаж дарамтлах, хувийн ашиг хонжоо эрэх, хууль зөрчсөн  үйлдлийг хаацайлан өөгшүүлэх, шударга бус зан чанар гаргаж болохгүйг санууллаа.

Мэргэжлийн хяналтын ерөнхий газрын дарга, Улсын ерөнхий байцаагч Д.Батмөнх мөн нийт улсын байцаагч, ажилтан, албан хаагчдадаа хандаж үг хэлэв. Өнгөрсөн хугацаанд чадварлаг, мэргэшсэн хамт олны хөдөлмөр, зүтгэлийн дүнд мэргэжлийн хяналтын байгууллага иргэдээ эрүүл, аюулгүй орчинд ажиллаж амьдрах, баталгаатай бүтээгдэхүүн, үйлчилгээ хэрэглэх нөхцлийг бүрдүүлж байгааг тэмдэглэлээ.

Түүнчлэн Мэргэжлийн хяналтын байгууллагын одоогийн тогтолцоог боловсронгуй болгож, хүний аюулгүй байдлыг  хангахад чиглэсэн харилцан уялдаатай хяналтуудын нэгдсэн тогтолцоог бүрдүүлэх нь цаашдын зорилт. Ийм өөрчлөлт шинэчлэлт хийх нь монгол хүний ажиллаж, амьдрах орчны аюулгүй байдлыг бодитой хангах нөхцлийг бий болгоно гэж үздэгээ илэрхийлэв.  

Эрхэлсэн ажилдаа амжилт гаргасан нэр бүхий хүмүүс Монгол Улсын Шадар сайд Д.Тэрбишдагва, Мэргэжлийн хяналтын ерөнхий газрын дарга Д.Батмөнх болон бусад удирдлагаас “Төрийн хяналт, шалгалтын тэргүүний ажилтан”, “Мэдээлэл, харилцаа, холбооны тэргүүний ажилтан”, “Улсын хяналтын тэргүүний ажилтан” цол тэмдэг, ерөнхий газрын жуух бичиг, “Хилийн төлөө” медалиа гардаж авлаа. Баярын хурлын үеэр 36 хүн төрийн жинхэнэ албан хаагчийн тангараг өргөж, төрийн өмнө хүлээсэн үүргээ нэр төртэй биелүүлж ажиллахаа андгайлав.   

Улсын хэмжээнд 2067 хүн мэргэжлийн хяналтын байгууллагад ажилладаг бөгөөд 50 гаруй хувь нь 40 хүртэл, 36 хувь нь 50, 13 хувь нь 50-иас дээш насныхан байна.  

Өнгөрсөн 11 жилийн хугацаанд Монгол Улсын гавьяат хэмээх эрхэм хүндтэй цолоор дөрвөн хүн энгэрээ мялааж 300 орчим хүн төр, засгийн одон медаль хүртжээ.