Гутал сонгохдоо пүүзний үдээсний өнгөөр сонгох биш улны бүтцийг нь анхаарах хэрэгтэй. Өөрийнхөө хөлийн улны талаар мэдмээр байвал Mizuno -гийн тестийг сонирхоод үзээрэй. Ер нь гутал сонгохдоо олон төрлийн пүрш, шинэ загварын гутал сонгохоосоо илүү хамгийн хөнгөхөн, эвтэйхэнийг нь сонгох хэрэгтэй байдаг юм.

Үүнд нэг чухал зүйл бий - хөлийнхөө өсгийгөөр газардаж гүйх нь буруу. Яагаад гэвэл биеийнхээ бүх жинг хөлийн өсгий дээрээ өгөх нь амархан ядраадаг. Үүний оронд хэрвээ халаалт хийж байвал аль болох өлмий дээрээ гүйнэ. Харин холын зайд гүйх гэж байгаа бол эхлээд нэг хөлийнхөө өлмийгөөр газардан улаараа гүйцэд гишгэсний дараа дараагийн хөл ажиллагаанд орно. Мэдээж нуруу цэх, мөр сул мөн гишгэлт шулуун байх хэрэгтэй.

Өдөр бүр нэгэн хэмжээний зайд гүйгээд ирэхээр аяндаа дасан гүйх газраа арай хурдан туулдаг болно. Харин бэлтгэлээсээ илүү их үр өгөөж авмаар байвал олон төрлийн гүйлтийг хооронд нь хослуулах хэрэгтэй. Үүнд богино хэмжээний тэсрэлттэй гүйлт, хурдан, удаан гүйлтийг хослуулах, удаан гүйлтээр хол зам туулах, эсвэл уул өөд гүйх, бартаатай газар шороогоор гүйх гэх мэт. Үргэлж зааланд гүйх нь бас буруу: энэ тохиолдолд хөлийн ул хавтгайрч гүйх тэсвэр тэвчээр багасна.

Төлөвлөлтийн хувьд гэвэл My Asics үнэхээр сайн програм бүтээжээ. ЭНЭ ЛИНКЭЭР ороод гүйх зорилгоо оруулж өгвөл төрөл бүрийн сонголт гарч ирэн, таны хувийн дасгалжуулагч болж чадна. Нэмж хэлэхэд үнэгүй :-)

Удаан явах юм бол хол зам туулна. Ихэнх хүмүүс нэг гүйлтээрээ асар их зам туулахыг хичээдэг. Мэдээж болно л доо, гэхдээ маргааш нь ахиж гүйхгүй л болов уу даа. Харин тэр хол замыг туулахад биеэ бага багаар бэлдэх нь жинхэнэ кайф. Тэгээд нэг л өдөр 20, 40 км зам хөнгөхөн гүйгээд сурчихвал өөртөө үнэхээр баярлаж, өөрөөрөө бахархах болно. Ер нь ямар ч зүйлийг хурдан эхэлбэл хурдан л дуусдаг болохоор тэвчээр ч энд давхар шалгагдана.

Гүйхийн өмнө халаалт хийх нь мэдээж гэмтэл бэртлээс урьдчилан хамгаална. Харин гүйсний дараах сунгалт нь булчинг хурдан сэргээж дараагийн удаа бэлтгэл хийхэд биеийг бүхэлд нь бэлэн болгож өгнө. Youtube -р гүйхийн өмнөх халаалт, гүйсний дараах сунгалт гээд олон дасгал байдаг. Тиймээс залхууралгүй хэдэн минут биеэ халаагаад гүйвэл хамаагүй дээр шүү.

Энэ маш энгийн - гүйснийхээ дараа нэг өдөр амрах хэрэгтэй. Хэрвээ хэт их ачаалал өгвөл дөнгөж гүйж эхэлж байгаа хүмүүсийн булчин хөндүүр болж ядаргаанд ч орж магадгүй. Тиймээс зөв хооллолт, зөв нойр, зөв гүйлтээ хооронд нь хослуулбал бие сайхан хөнгөрч сэтгэл санаа ч бас давхар өөдрөг болно.

Компьютерын ард байгаа хүнийг бодвол гүйж байгаа хүн илүү энерги зарцуулдаг болохоор илүү хоол идэж энергиэ нөхөж байх хэрэгтэй. Харин тос бага, уураг ихтэй хоол идээрэй. ЭНЭ ЛИНКЭЭР ороод үзвэл зургаар тайлбарласан зөв хооллолтын мэдээ байгаа.

Бид гүйж байхдаа их хэмжээний шингэн алддаг болохоор биеийн шингэний хэмжээг үргэлж нөхөж байх хэрэгтэй. Хүн бүр өөр ч ер нь 10 км тутамд ус уух нь хэвийн юм. Харин бэлтгэл эхлэхээс өмнө бас дууссаны дараа заавал ус уух шаардлагатай. Усны хувьд хэт халуун эсвэл хүйтэн байх юм бол биед ороод сайн шингэж чадахгүй.

Хөнгөхөн, агаар нэвтэрч байхаар материалаар хийгдсэн хувцас сонгоорой. Гүйхэд их хөлс гарч хувцас хамаг биед наалдах шиг онцгүй зүйл байдаггүй болохоор амархан хатдаг байх хэрэгтэй. 

Аадар бороо ороогүй л бол шиврээ бороо орж байхад гүйж болно. Тэгэх нь арьсанд чийг өгч сайнаар нөлөөлөх болно. 

Хамгийн гоё урам зориг бол найзуудтайгаа юм уу хажууд гүйж байгаа хүнээ харах юм. Хүсвэл Facebook дээр “Гүйх event” үүсгээд хэдэн хамтрагчидтай болж болно. Талбай дээр уулзаж эхлээд Сансар Түнэл ороод доош нарны замаараа Marshall Town хүртэл гүйн буцаад Талбай уруу ирэхэд яг таарна. Бас нэг чухал зүйл - сайхан дуу сонсонгоо гүйх ч урамтай. Тийм болохоор эрч хүч өгөх гоё дуунуудаа хуулж аваад урагшаа.