Нийслэлийн Прокурорын газар прокурорын байгууллагын үйл ажиллагааг олон нийтэд хүргэх, гэмт хэргээс урьдчилан сэргийлэх ажлыг эрчимжүүлэх зорилгоор 2014 онд нийслэл, дүүргийн хэмжээнд гэмт хэргээс урьдчилаг сэргийлэх чиглэлээр хийх ажлын нэгдсэн төлөвлөгөөг Нийслэлийн прокуpороoр батлуулан ажиллаж байгаа ажээ.

Дээрх төлөвлөгөөнд тусгагдсаны дагуу Нийслэлийн хэмжээнд гэмт хэрэг зөрчил их гардаг обьектын судалгааг Нийслэлийн 8 дүүрэгт үйл ажиллагаа эрхэлдэг аж ахуй нэгж, байгууллагуудыг хамруулан 2013, 2014 оны эхний улирлын байдлаар судалжээ.

Судалгаагаар Нийслэлийн хэмжээнд үйл ажиллагаа явуулж буй нийт 167 обьектыг гэмт хэрэг зөрчил их гардаг гэж дүгнэсэн ба үүнээс 153 буюу 91 хувь нь хувийн хэвшлийн, 14 буюу 9 хувь нь төрийн байгууллага байна.

Гэмт хэрэг, зөрчил их гаргаж байгаа хувийн хэвшлийн аж ахуй нэгж, байгууллагуудыг үйл ажиллагааны чиглэлээр нь авч үзвэл худалдаа үйлчилгээний чиглэлээр үйл ажиллагаа явуулдаг байгууллага нийт хэрэг, зөрчил гаргаж буй обьектын 37 хувийг, баар, цэнгээний газар 26 хувийг зочид буудлын чиглэлээр үйл ажиллагаа явуулдаг аж ахуй нэгж, байгууллага 9,5 хувийг, комьпютер тоглоомын газар, баригдаж буй барилга, хувийн их, дээд сургуулиудад тус тус гэмт хэрэг, зөрчил их гарч байна. Нийт гэмт хэрэг, зөрчил гаргаж буй обьектуудаас худалдаа үйлчилгээний чиглэлээр үйл ажиллагаа эрхэлдэг байгууллага дийлэнх хувийг эзэлж байгаа үүнд “Барс” “Нарантуул” “Бөмбөгөр” “Алтжин бөмбөгөр” “Хархорин” зэрэг томоохон зах, худалдааны төвүүд байна.

Судалгааны явцад гэмт хэрэг, зөрчил их гаргадаг аж ахуй нэгж, байгууллагуудын ажилтан албан хаагч нарт гэмт хэргээс урьдчилан сэргийлэх зорилгоор сургалтуудыг зохион байгуулсны гадна гэмт хэргээс урьдчилан сэргийлэх , гэмт хэрэг гаргахад нөлөөлсөн шалтгаан нөхцлийг арилуулахаар прокурорын мэдэгдэл 23 бичиж холбогдох газруудад хүргүүлж, биелэлтийг тооцож ажиллахаар шийдвэрлэжээ.