Ерөнхий сайд асан С.Баяр хэдхэн хоногийн өмнө эхнэр хүүхдийн хамтаар эх орондоо ирсэн. Түүнийг Монголд бүрмөсөн сууршина гэсэн сураг байгаа бөгөөд тэрээр үүнийгээ батлах мэт өөрийн бизнесийг эрчимжүүлж эхэллээ.

Тухайлбал түүний өмчлөлд зуун хувь байдаг Хан-уул дүүрэг дэх Palace зочид буудал их засвар хийж эхэлсэн байна. Тус барилгын цонх, зарим хана таазыг нураасан бөгөөд одоо зөвхөн суурь карказ нь л үлдээд байгаа юм.

Зочид буудлын их засвар хүн хүч, машин техник элбэгтэйгээр эрчимтэй явагдаж байгаа ч ойр орчмын оршин суугчдын эсэргүүцэлтэй тулгарч эхэлжээ. Тодруулбал Palace зочид буудлын завсарын ажил шөнийн цагаар ч явагдаж байгаа бөгөөд ингэхдээ техник хэрэгсэлээ ажиллуулж оршин суугчдын тав тухыг алдагдуулж байгаа юм. Уг нь МХЕГ-аас гаргасан журмын дагуу оройн 22.00 цагаас хойш барилгын ажил хийгдэх ёсгүй. Гэтэл С.Баярын зочид буудалд энэ журам үйлчлэхгүй байгаад иргэд бухимдалтай байна.