Ховд аймгийн Булган сум дахь Сум дундын прокурорын газар нь 2013 онд Улсын төсвийн хөрөнгө оруулалтаар шинэ барилга хүлээн авч прокурор, ажиллагсдын ажлын байрны ажиллах орчин сайжирсан жил болсон юм.Тус прокурорын газрын хамт олон шинэ байранд орсонтой холбогдуулан 2014 оныг “Нийгмийн хариуцлага”-ыг дээшлүүлж сумандаа шилдэг тохижилттой үлгэр жишээ байгууллага болох, ажиллагсдынхаа нийгмийн асуудлыг шийдвэрлэх жил болгож, энэ зорилтын хүрээнд 2 дугаар улирлын төлөвлөгөөнд байгууллагын гадна орчныг тохижуулах ажлыг тусгаж 4 сарын 1-нээс 6 сарын 1-ийг хүртэл 2 сарын хугацаанд дотоодынхоо ажиллах хүчний нөөц бололцоог ашиглан тохижилтын ажлыг хийж гүйцэтгэжээ.
Байгууллагын гадна хийгдэх ногоон байгууламжийн зураг, төслийг хийж орон нутгийн удирдлагуудад танилцуулан Булган, Үенч сумдын Засаг дарга нар орон нутгийн хөгжлийн сангаас мөнгөн хөрөнгийн дэмжлэг үзүүлж бусад төрийн байгууллагын туслалцаа дэмжлэгээр доорхи ажлыг хийж бүтээжээ.
Үүнд:
Байгууллагын гадна талд 30*25 метрийн харьцаатай 1.2 метрийн өндөртэй бетонон суурьтай хашааг 2*2, 2*4, 4*4 см-ийн төмрийг тасдах, гагнах зэргээр хийж гүйцэтгэхэд Булган нисэх буудлын удирдлага, хамт олон тусалсан бол 4 м-ийн диаметртэй усан оргилуурыг хийж гүйцэтгэхэд Хилийн цэргийн 0130-р ангийн удирдлага нь цэрэг болон сантехникийн мэргэжлийн хүмүүсээр газар шороо ухах, оргилуур угсарах ажлыг хийж гүйцэтгүүлсэн байна.
Мөн ногоон байгууламж дотор модны тайрдасыг газарт суулгах хэлбэрээр явган замыг хийсэн бөгөөд 1-р 12 жилийн сургууль 1 машин хуурай улиас мод өгсөн бол, бетонон өнгөлгөөний тоосгоор 11 ширхэг цэцгийн мандал хийх ажлыг Хаш-Өргөө компани өрлөгчин, засал чимэглэлийн мэргэжлийн хүн өгч хийлгэсэн зэргээр олон сайхан байгууллага, хамт олон хоорондын хамтын ажиллагааны хүрээнд туслаж дэмжсэн байна.
Түүнчлэн тус прокурорын газрын хамт олон хамтын хүчээр 11 машины авто зогсоол, 2 ширхэг орчин үеийн тохилог сүүдрэвч, 66 ширхэг бургасны, 9 ширхэг чацарганы, 10 ширхэг сливний, 11 ширхэг үхрийн нүдний суулгац тариалж үлдсэн газрыг нь зүлэгжүүлжээ.
Байгууллагын орчин тойрныг оройн цагаар гэрэлтүүлэг сайтай байлгах зорилгоор хаяг, логог гэрэлтүүлэх 2 ширхэг паржуктор, гадна талдаа 6 ширхэг гудамжны гэрэл, байгууламж дотор 10 ширхэг гэрлэн мод, усан оргилуурыг замын дагуу 6 ширхэг явган гэрэл мөн усан оргилуурын цацарсан усыг гэрэлтүүлэх 6 ширхэг өнгийн гэрлийг суурилуулах зэргээр гадна өнгө үзэмжийг нь сайжруулсан байна.
Ногоон байгууламжийг тохижуулахад эрчим хүчний хэмнэлтэй гэрэлтүүлэг ашиглаж, хуурай улиас модоор загасны дүрстэй сандал, том тайрдсыг ашиглан шатар даамны хөлөг хийснээс гадна, явган хүний замыг санаачлан хийжээ.
Мөн модны тайрдсыг будаж лаакдан дээр нь дүрс зурж чимэглэсэн нь байгалиа сэргээсэн зохицол бүхий шийдэл болжээ.
Ногоон байгууламжийг амжилттай хийж дуусган 6 сарын 1-ний өдөр Сум орон нутгийн удирлагууд болон нутгийн иргэдэд танилцуулан нээж, одоо албан байгууллага, ард иргэд үлгэр жишээ авч туршлага судлан, оройн цагаар хүмүүс ирж амрах зэргээр тохилог орчныг бүрдүүлсэн байх ба тус прокурорын газрын гэрэлтүүлэг, гадна орчин сум орон нутгийн өнгө үзэмжийг нэмэгдүүлсэн шинэлэг зүйл болсон байна.
