Улсын Ерөнхий Прокурорын газрын дэргэдэх “Сургалт, судалгааны төв” нь прокурор ажилчдын мэдлэг боловсролыг дээшлүүлэх зорилгоор байгуулагдаж 2014 оны 1 дүгээр сараас эхлэн үйл ажиллагаагаа явуулж эхэлсэн бөгөөд прокурорын байгууллагын хэмжээнд явуулах сургалтын хэрэгцээ шаардлагын талаар нэгж прокурорын газруудаас ирүүлсэн санал авч нэгтгэн сургалтын хөтөлбөр, төлөвлөгөөнд тусган ажиллаж байгаа юм.

Тус сургалтын төв нь үйл ажиллагаагаа явуулж эхэлсэнээс хойш 5 сарын хугацаанд 9 удаа 654 хүнд /давхардсан тоогоор/ 290 цагийн сургалтыг дангаараа болон бусад байгууллагатай хамтран зохион байгуулсан бөгөөд 33 хувь нь МШАТХ, 24 хувь нь ЯЭАТХ, 23 хувь нь МДШХ хяналтын прокурор, 20 хувь нь үйлчилгээний ажилчид, албан хаагчид хамрагдсан байна.

Түүнчлэн сургалт, судалгааны төвд зохион байгуулагдсан дотоод гадаадын сургалтуудын зохион байгуулалтын ажлыг хариуцаж ажиллахаас гадна сургалтын хөтөлбөр, хуваарь төсөв, багш нар болон бусад байгууллагтай гэрээ байгуулах ажлуудыг хийж гүйцэтгэсэн бөгөөд сургалтын талаар хэвлэл мэдээллийн хэрэгслээр /вэб сайтад/ 10 удаа, телевизэд 5 удаа сурталчилан ажилллажээ.

Энэ хугацаанд ирсэн саналуудын хувьд

    Жилд 1-2 удаа прокуроруудыг сургалтанд хамруулж байх
    Гадаад улс руу сургалтанд явж байгаагүй прокуроруудаас явуулж байх
    Сургалтын сэдвийн дагуу гарын авлага гаргах
    Тараах материал өгөх
    Шинжилгээний байгууллагаар хичээл заалгах
    Танин мэдэхүйн сургалт явуулах
     Практик дээр тулгуурлан бодлого бодуулах
    Хэтэрхий ярианы хэлбэртэй байгааг өөрчлөх
    Прокуроруудын дунд хууль хэрэглээний талаар илтгэл уралдаан зохион байгуулах зэрэг саналуудыг гаргасан байна.

Сургалтанд оролцогчдоос сургалтын талаар судалгаа авахад /давхардсан тоогооор/ 18 прокурор буюу 21% нь багшийн сонголтыг оновчтой болгох, 6 буюу 7% нь хичээлийн арга хэлбэрийг өөрчлөх, 29 буюу 35% нь сэдвийн сонголтыг сайжруулах, 26 буюу 31% нь сургалтын идэвхитэй аргуудыг ашиглах, 39 буюу 47% нь шинэ хуулиудаар хичээл оруулах, 35 буюу 42% нь практик сургалт бодлого тест бодуулах,13 буюу 15% нь сургалт хангалттай сайн төвшинд байна гэж дүгнэжээ.

Тиймээс Сургалт судалгааны төвийн зөвлөлийн гишүүд болох УДШ-ийн практик судлалын хэлтсийн дарга, доктор профессор Ч.Нямсүрэн, УЕПГ-ын Тамгын газрын гадаад харилцаа хариуцсан референт, хууль зүйн шинжлэх ухааны дэд доктор Г.Ууганболор,  Хууль зүйн үндэсний хүрээлэнгийн Сургалтын төвийн дарга, хууль зүйн доктор Ц.Цэлмэг, Сургалт судалгааны төвийн төлөвлөлт хариуцсан хяналтын прокурор Ш.Сүхбат, Судалгаа хариуцсан хяналтын прокурор П.Халиун, Сургалт хариуцсан хяналтын прокурор Б.Мэндсайхан, Менежер Ж.Ичинхорлоо нарын бүрэлдэхүүнтэй зөвлөлийн гишүүд 2014 оны 06-р сарын 13-ны өдөр анхны хурлаа зохион байгуулж өнгөрсөн хугацаанд хийсэн ажилаа дүгнэж цаашид хийх ажлын саналаа гаргалаа.

Үүнд

    Прокуроруудын сургалтанд  5 сарын хугацаанд нийт  прокуроруудын 60 орчим хувь хамрагдсан ба үлдсэн 40 хувь нь ихэвчлэн хөдөө орон нутгийн прокурорууд байгаа учир эдгээрийг бүгдийг нь сургалтанд тэгш хамруулах
    Улс, нийслэл, тээвэр, дүүргийн прокуроруудад өөр өөрсдийнхөн үүрэг, чиглэлийн дагуу түвшинд нь тохирсон сургалтыг явуулах
    Прокуроруудын мэдлэг чадварыг дээшлүүлж дотроосоо чадварлаг сургагч багш бэлтгэх
    Судалгааны баг ажилуулах
    Орон нутагт өөрсдийн сургагч багш бэлдэх
    Хичээл заалгах багшаа судалгааны үндсэн дээр мэдлэг туршлагтай хүн сонгож байх
    Зөвхөн эрүүгийн эрх зүйн биш бусад төрлийн сургалтуудыг түлхүү явуулах
    Өөрийн сэтгүүлтэй болох
    Сургалтын төв дээр явагдаж байгаа сургалтын явц, оролцоо, үр дүнг мэдээлэх өөрийн веб сайттай болох зэрэг асуудлаар санал дүгнэлт гаргалаа.