Ус Сувгын Удирдах газар ШӨХТГ-тай хамтран усны үнийг нэмэх шийдвэр гаргасан билээ. Гэхдээ тэд хэрхэн нэмэгдэхийг эцэслэн тогтоогоогүй байсан юм. Тэгвэл энэ асуудлаар Хот, суурины ус хангамж, ариутгах татуургын ашиглалт үйлчилгээг зохицуулах зөвлөл энэ сарын 13-нд хуралджээ.

Хурлаас Улаанбаатар хотод цэвэр усны төлбөр литр тутам нь 32 мөнгө байсныг 48 болгосон бол бохир усны төлбөр 24 мөнгө байхаар тогтов.

Дээрх үнийг Улаанбаатар хот, Налайх, Багануур, Төв аймгийн орон сууц, үйлдвэр, аж ахуйн нэгжүүд  ирэх долдугаар сарын 15-наас баримталж эхлэх юм.

Мөн хэрэглэгчдийг усаар тасралтгүй хангаж, 24 цаг бэлэн байлгахад шаардагдах зардлыг нөхөх, үйлчилгээний хэвийн ажиллагааг хангах зорилгоор усны суурь хураамжийг нэвтрүүлэхээр болжээ.

Усны суурь хураамжийг Улаанбаатар хотын орон сууцны нэг өрх сардаа 2500 төгрөг төлөхөөр тогтоосон бөгөөд энэ нь хоногт 83 төгрөг, Багануур, Налайх, Төв аймагт 1800 төгрөг буюу хоногт 60 төгрөг болж байгаа юм.

Харин үйлдвэр аж ахуйн нэгжийн цэвэр усны тариф Улаанбаатар хотод 91 мөнгөөс 1.2 төгрөг, бохир усны тариф 60 мөнгөнөөс 1.5 төгрөг, Налайх цэвэр усны үнэ 1.67 мөнгөнөөс 1.8 төгрөг, бохир ус 1.2-оос 1.3 төгрөг, Багануур дүүргийн цэвэр, бохир усны тариф  1.15-1.2 төгрөг,  Төв аймгийнх 1.83-2.28 төгрөг болж нэмэгджээ.