Улаанбаатарт үйл ажиллагаа явуулж буй техникийн захуудын орчимд замын түгжрэл байнга үүсдэг тул энэ асуудлыг шийдэхээр нийслэлийн удирдлагууд тэдгээрийг хотын төвөөс нүүлгэх талаар судалж эхэлсэн. Тэр дундаа “Өгөөмөр”, “Да Хүрээ” захыг эхний ээлжинд байршлыг нь өөрчилнө гэж ярилцаж байгаа.  Тэгвэл нүүнэ гэсэн сургаар “Өгөөмөр” техникийн захын захиргаа хашаа хороогоо янзалж, өнгө үзэмжтэй болгоод авсан. Гэтэл хэдэн төгрөг гаргаж хашаагаа засаж янзалсаныхаа төлбөр тооцоог хэд нугалж олох гэж байгаа аятай түрээслэгчдийг “шулж” эхэллээ. Тодруулбал, “Өгөөмөр” техникийн захын захиргаа өнгөрсөн долоо хоногоос түрээслэгчдээсээ авто зогсоолын төлбөр авч эхэлсэн. Ингэхдээ 121 буюу 2 цагаас дээш зогссон иргэдээс цаг тутмын 4000 төгрөг тооцож авах журам гаргасан байна.
Ингэснээр түрээслэгчид өдөртөө 30000-40000 мянган төгрөг төлөх эрсдэлтэй болж байна. Учир нь түрээслэгчид өдөрт дор хаяж 8-10 цаг машинаа байрлуулдаг. Тэгэхээр цаг тутмын 4000 мянган төгрөг төлөх нь сард түрээсийн 135 мянган төгрөгөөсөө гадна зөвхөн машины түрээс гэж сард 900 мянган төгрөг төлөх аюулд унаад байгаа юм байна.
Харин тус захын захиргааных нь зүгээс “Бид үйлчлүүлэгчээ бодож ийм шийдвэр гаргасан” гэх зүйлийг ярьж суугаа юм.

Юутай ч бид зуу, зуун хүний эрх ашиг хөндөгдөөд байгаа “Өгөөмөр” захыг зорьж энэ асуудлаар  сурвалжлага бэлтгэх гэсэн боловч “Хэвлэл мэдээллийн хэрэгслээр энэ асуудлыг шүүмжилсэнээс болоод зогсоолын төлбөр гэж нэхэмжлэхээ болисон” гэх зүйлийг ярив.
Манай сурвалжлах багийг очиход “Өгөөмөр ” зах дээр хөл хөдөлгөөн ихтэй,  захын хаалгаар орох машин бүрт  тасалбар өгч мөнгө татаж байв.

Улмаар түрээслэгчидтэй уулзаж энэ талаар асуухад “Хэвлэл мэдээллийн хэрэгсэл гэж айхтар хүчтэй зүйл байх юм. Энэ асуудлаар ганцхан хэвлэл мэдээллийн хэрэгслээр цацагдаад л Захиргааныхан журмаа буцаачихлаа” гэсэн юм. Харин тэр хаалгаар орж, гарч байгаа машинуудад өгөөд байгаа тасалбар нь 500, 1000 төгрөгний тасалбар бөгөөд үүнийг орж гарахдаа л авах ёстой юм байна.
Ийн түрээслэгчид, үйлчлүүлэгчдээсээ багагүй мөнгө татаж нэлээн асуудлыг дагуулаад байсан “Өгөөмөр” захын удирдлагууд хурдан шуурхай өөрсдийн гаргасан алдаатай шийдвэрээ буцаажээ.