Нийслэлийн шийдвэр гүйцэтгэх албанд ажиллагаа явуулж буй торгох, эд хөрөнгө хураах, албадан ажил хийлгэх, тодорхой албан тушаал эрхлэх, үйл ажиллагаа явуулах эрхийг хасах ялын биелэлт, ажлын үр дүнг 2014 оны 03 дугаар сарын 10-ны өдрийн байдлаар Нийслэлийн прокурорын газрын Ял эдлүүлэх ажиллагаанд хяналт тавих ажил хариуцсан хэлтсээс танилцаж судлаад ялын биелэлт хангалтгүй байгаатай холбогдуулж дүүргийн прокурорын газрын ял эдлүүлэх ажиллагаанд тавих хяналт хариуцсан хэлтсийн хорихоос өөр төрлийн ялд хяналт тавих ажлын чанар, үр дүнг сайжруулж, ял тус бүрээр тодорхой ажил зохион байгуулж ажиллах тухай Нийслэлийн прокурорын 10 тоот албан даалгаврыг хүргүүлсэн ба биелэлтийг 2014 оны 06 дугаар сарын 01-ний байдлаар тооцож үзлээ.

 Нийслэлийн прокурорын албан даалгаврын хугацаанд дүүргийн прокурорын газруудаас удирдлага зохион байгуулалтын багагүй ажлыг хийж гүйцэтгэснээр хорихоос өөр төрлийн ялын биелэлт дүүргийн прокурорын газруудад өссөн дүнтэй байна. Жишээлбэл: Дүүргийн 1 дүгээр прокурорын газарт анх шалгалт хийж байх хугацаанд  торгох ялын биелэлт 27,6 хувь байсан бол 43.5 хувь болж 15.9 хувиар, дүүргийн 2 дугаар прокурорын газарт 22,9 хувьтай байсан бол 38.8 хувь болж 15.9 хувиар, дүүргийн 4 дүгээр прокурорын газарт 6,3 хувь байсан бол 12,8 хувь болж 6,5 хувиар тус тус өссөн үзүүлэлттэй байна.

 Эд хөрөнгө хураах ял дүүргийн 1 дүгээр прокурорын газарт 6,2 хувьтай байсан бол 43,8 хувьтай болж 37,6 хувиар, дүүргийн 2 дугаар прокурорыг газарт 3,7 хувьтай байсан бол 34,6 хувь болж 30,9 хувиар, дүүргийн 4 дүгээр прокурорын газарт 16,9 хувьтай байсан бол 65,1 хувь болж 48,2 хувиар тус тус өссөн байна.

 Мөн албан даалгаврын хүрээнд шүүхээс ялтны шийтгэх тогтоол, магадлал, гүйцэтгэх хуудсыг Шүүхийн шийдвэр гүйцэтгэх тухай хууль, Эрүүгийн байцаан шийтгэх хуульд заасан хугацаанд ирүүлэхгүй байгаа асуудлыг судалж Эрүүгийн анхан шатны 1, 2 дугаар шүүхэд хууль хэрэгжүүлэн ажиллах тухай албан бичиг хүргүүлснээр 127 гүйцэтгэх хуудсыг нөхөн бичүүлж ирүүлснээр шийдвэр гүйцэтгэлийн ажиллагаа явуулж байна.