Шүүх эрх мэдлийн шинэчлэлийн хүрээнд Шүүхийн тухай хууль, Цагдаагийн албаны тухай хууль, Тахарын албаны тухай зэрэг хуулиуд шинээр батлагдан гарч хэрэгжиж байгаа бөгөөд хуулиудыг хэрэгжүүлэх явцад  зарим бэрхшээл анхаарах асуудлууд гарч байгаа талаар иргэд олон нийт санаа бодлоо илэрхийлж байгааг харгалзан нийслэл, тээвэр, дүүргийн прокурор, цагдаагийн газар хэлтсийн удирдах ажилтны зөвлөгөөнийг өчигдөр УЕПГ-т зохион байгуулж  хийлээ.  

Зөвлөгөөнд прокурор цагдаагийн байгууллагын 65 удирдах ажилтан оролцож шүүх эрх мэдлийн шинэчлэлийн хүрээнд нэн даруй авч хэрэгжүүлэх асуудлуудыг хэлэлцэж цаашид авах арга хэмжээний талаар санал шүүмжлэл гаргалаа.

Шинээр батлагдсан хуулиудыг хэрэгжүүлэх явцад прокурор цагдаагийн байгуулагын зарим ажилтнуудын сахилга хариуцлага хангалтгүй, эрүүгийн хэргийг удаан хугацаагаар шалгаж иргэдийг хохироодог, иргэдийн өргөдөл гомдол хүсэлтэд хайхрамжгүй ханддаг, хуулийн ажилтны ёс зүйг зөрчдөг зэрэг шүүмжлэлүүд олонтаа гарч байгаагийн шалтгаан нөгцлийг арилгах, ажилтнуудынхаа сахилга хариуцлагыг дээшлүүлэх талаар хэрхэн ажиллах, энэ талаар бодлогын шинжтэй авч хэрэгжүүлэх арга хэмжээ, зорилтоо тодорхойлоход зөвлөгөөний үйл ажиллагаа чиглэгдлээ.

Зөвлөгөөнд “Хуулийн байгууллагын ажилтнуудын сахилга хариуцлагыг дээшлүүлэх талаархи асуудлууд“ сэдвээр Улсын Ерөнхий Прокурорын туслах, МШАТХХХ-ийн дарга Е.Сагсай,  “Прокурор цагдаагийн байгууллагын үйл ажиллагаанд тулгамдаж буй зарим асуудал” сэдвээр ЦЕГ-ын Гэмт хэрэгтэй тэмцэх газрын МШАДҮМГ-ын МДШХ-ийн дарга, цагдаагийн хурандаа Б.Даваадорж нар илтгэл тавьж хэлэлцүүлсэн бөгөөд зөвлөгөөний үйл ажиллагааг орон нутагт онлайн сүлжээгээр хүргэж, аймгийн прокурор цагдаагийн газрын удирдлагуудыг оролцууллаа.

Зөвлөгөөнөөр хэлэлцсэн асуудалтай холбогдуулж 22 прокурор, цагдаагийн ажилтанаас санал шүүмжлэл гарсан бөгөөд  шинээр батлагдан гарсан хуулиудыг хэрэгжүүлэхэд гарч буй зарим бэрхшээл асуудлуудыг нэгдсэн ойлголт, үйл ажиллагаагаараа  шийдвэрлэж байх талаар чиглэл удирдамж өгөгдснөөрөө энэхүү зөвлөгөөн чухал ач холбогдолтой боллоо.

Зөвлөгөөний явцад гарсан саналуудыг 3 чиглэлээр ангилан авч үзлээ.

 Үүнд

     Прокурор цагдаагийн байгууллага дотооддоо авч хэрэгжүүлж болох  арга хэмжээ,
     Холбогдох хуулиудад нэмэлт өөрчлөлт оруулах талаар УИХ, Засгийн газарт тодорхой саналуудыг уламжлах
    Урьд нь холбогдох тушаал албан даалгавраар журамласан асуудлыг бүрэн хэрэгжүүлж ажиллах гэсэн байдлаар тодорхойлж ажиллахаар боллоо.

Зөвлөгөөнөөр хэлэлцсэн асуудалтай холбогдуулж Улсын Ерөнхий Прокурор, Төрийн Хууль Цаазын тэргүүн зөвлөх Д.Дорлигжав цаашид хийх ажлын талаар үүрэг даалгавар өглөө.

Удирдах ажилтны зөвлөгөөний талаарх видео мэдээллийг тун удахгүй веб сайтанд байршуулах болно.