Өршөөлийн хуулийн төслийг өргөн барих хэрэгтэй эсэх дээр багагүй асуудал дэгдээд байгаа. Иргэд ч энэ тал дээр хоёр хуваагдсан байр суурьтай байгаа. Тэгвэл Өршөөлийн хуулийн талаар УЕПГ-ын Ерөнхий прокурор Д.Дорлигжаваас тодруулахад "Өршөөлийн хуулийн тал дээр хоёр янзын төсөл явж байгаа юм байна. Нэг нь Ц.Оюунбаатар гишүүний санаачилсан хуулийн төсөл. Нөгөө нь эдийн засгийн бизнесийн орчинг дэмжих зорилгоор гэсэн хоёр төсөл явж байгаа. Сүүлийн үед үүнийгээ нэгтэж байгаа сураг байна. Прокурорын байгууллагаас хатуу барьж байгаа нэг байр суурь байгаа. Тодруулбал, албан тушаалтны хэрэг, авлигын хэрэг, санаатай үйлдсэн хохирол ихээр учруулсан  хэргүүдийг өршөөхгүй гэж байгаа. Мөн урьд нь өршөөгдсөн, уучлагдсан хүмүүсийг үүнд хамруулахгүй. Тухайлбал, Хохиролтой хэргүүдийг өршөөчихлөө гэж бодоход тухайн иргэний хохирлыг хэн арилгаж өгөх юм. Энэ хэрэг хэрэгсэхгүй болсон гээд л явчихна шүү дээ.

Ялын бодлого талаасаа аваад үзвэл Өршөөлийн хууль бараг шаардлагагүй. Харин УИХ бид нарын санал болгоод байгаа эрүүгийн шинэ хуулийг батлан гаргавал нэлээд олон хэрэг хөнгөрөх байгаа. Мөн олон хүн ял эдлэх ажиллагаанаас чөлөөлөгдөх байгаа. Энэ хуулиар цоо шинэ төрлийн хэрэг ч орж ирж байгаа. Зарим хэргүүд ч хэрэг биш болж байгаа. Шинэ хуулиар одоогийн ял эдэлж байгаа хүмүүсийн 30-35 хувьд шууд чөлөөлөгдөнө. Ер нь санаатай үйлдсэн хүнд хохиролтой, албан тушаал авлигын хэрэгтэй, өмнө нь уучлагдаж, өршөөгдөж байсан хүмүүсийг ялын бодлогод хамруулах нь маш буруу" гэв.