Тэд үүнийгээ “Хамгийн анх төрийн ордонд хонхны баяраа хийсэн ангийнхан бид боллоо” хэмээн тунхаглаж, гоё ганган зургууд нь нүүр номын хэрэглэгчдийг ангайлгаад бас атаархуулаад авчээ. Бүр болоогүй УИХ-ын нэр бүхий гишүүдээс гардан авсанаа сайрхан бичиж зураг хөргөө татуулаад амжсан байх юм. Тэдний дунд “Гоёл-2014” наадмын шилдэг эмэгтэй загвар өмсөгч Н.Сарнай ч төгсөж байгаа аж.

Үнэхээр тэдний хэлснээр энэ бол төрийн ордонд хонхны баяр тэмдэглэж байгаа анхны тохиолдол. Гэхдээ төрийн ордонд зохиогдсон хачин жигтэй үйл ажиллагаа дан ганц энэ биш бөгөөд үүнд цагаан эсгий дэвсгэртэй поп дуучин Д.Болдын тоглолтыг дурдахгүй өнгөрч болохгүй.

Бидний мэдэх төрийн ордон энгийн номхон ард иргэдээ өмссөн зүүснээр нь ялгаж хөл гишгүүлдэггүй хатуу чанга дүрэмтэй. Костюм пиджак авах мөнгөгүй бол та тийшээ зүглэх ч эрхгүй. Гэтэл зарим хүмүүсийн тоглолт, хонхны баярыг уламжлалаа уландаа гишгиж байгаад ч хамаагүй зохион байгуулах жишээтэй.

Хамгийн гол нь энэ бүхэн монголчуудын дунд нэг төрлийн ухаангүй өрсөлдөөнийг бий болгоно. Тэрхүү өрсөлдөөн хэн төрийн ордонд тоглолт эсвэл хонхны баяраа зохион байгуулах вэ? нэртэй байх бөгөөд тийм хүсэл өвөрлөгчид уртаас урт оочер, дугаар үүсгэх биз. Ингээд эхэлбэл монгол төрийн ордон үзвэр үйлчилгээний газраас ялгаа юун. Түүхэн уламжлал талаасаа төрийн ордон өргөөгөө хэт задгай үзвэр үйлчилгээний газар болгох нь ард түмэнд хэр таалагдах бол?

Тиймээс урлагийн тоглолт нь театртаа, хонхны баярууд нь тус тусын сургуульдаа болж байвал яасан юм. Эс бөгөөс монгол төрийн ордон үзвэр үйлчилгээний байгууллага болчихоод "Маргааш Төрийн ордонд дискотой" гэж зарлах цаг мөдхөн ирэх буй заа.