Улсын Ерөнхий Прокурорын дэргэдэх зөвлөлийн хуралдаан 2014 оны 6 дугаар сарын 17-ны өдөр боллоо.Хуралдаанаар “Прокурорын тухай хуулийн төсөл, Улсын Ерөнхий Прокурорын 1/01 тоот албан даалгаврын хэрэгжилт, Хэрэг бүртгэгч мөрдөн байцаагч, прокурор шүүгчийн буруутай ажиллагааны улмаас төрөөс мөнгө гаргуулах тухай нэхэмжлэлийн шийдвэрлэлтийн талаар УЕПГ-ын Сургалт судалгааны төвөөс хийсэн судалгааны дүн, Прокурорын байгууллагын дотоод хяналт шалгалтыг зохион байгуулах журам, УЕПГ-ын дотоод хяналт шалгалтын хэлтсийн прокуроруудын ажил үүргийн хуваарь, УЕПГ-ын дотоод аудиторын ажиллах журам, Дорнод аймгийн прокурорын газраас хийж гүйцэтгэсэн ажлыг шалган тусалж, сургалт зохион байгуулсан ажлын үр дүн“ гэсэн асуудлуудыг хэлэлцлээ.
Зөвлөлийн хуралдаанаас аймаг нийслэл тээвэр дүүргийн прокурорын газрууд Улсын Ерөнхий Прокурор 1/01 тоот албан даалгаврыг хэрэгжүүлэх талаар 2013 онд анхаарч ажилласан, харъяа прокурорын газрууд хэрэг бүртгэх мөрдөн байцаах ажиллагаанд тавих хяналтын ажлын чанар үр нөлөөг дээшлүүлэхийн тулд эрүүгийн хэрэгт прокуророос бичих даалгаврын тоо чанарыг нэмэгдүүлсэн, байх ба өнгөрсөн онд прокурорууд эрүүгийн хэрэгт 11527 даалгавар бичсэний 64 хувийг хэргийг шалгах явцад нь бичсэн байна.
Прокуроруур хэргийн газрын үзлэгт оролцох оролцоо өмнөх оныхоос 3.2 хувиар өссөн зэрэг эерэг үзүүлэлт байгаа ч түдгэлзүүлсэн хэрийн тоо 11.4 хувиар өссөн нь ажлын сөрөг үзүүлэлт болж байгааг цаашид анхаарч түдгэлзүүлсэн хэргийг шалгуулж шийдвэрлэх асуудлыг анхааралдаа байнга байлгаж ажиллах нь зүйтэй гэж үзлээ.
УЕПГ-ын “Сургалт судалгааны төвөөс“ Хэрэг бүртгэгч мөрдөн байцаагч прокурор ,шүүгчийн буруутай ажиллагааны улмаас төрөөс мөнгө гаргуулах тухай нэхэмжлэл”-ийн талаар хийсэн судалгаа нь чухал асуудлыг хөндсөн, зохих хэмжээнд хийгдсэн байна гэж хуралдаанаас дүгнэж, цаашид судалгааны дүнг үндэслэн шүүх болон холбогдох бусад байгууллагуудад мэдээлэл хүргүүлэх нь зүйтэй гэж шийдвэрлэлээ.
Прокурорын байгууллагын дотоод хяналт шалгалтыг зохион байгуулах журам, УЕПГ-ын дотоод аудиторын ажиллах журам”-ын төсөл, УЕПГ-ын ДХШХэлтсийн прокуроруудын ажил үүргийн хуваарийг зөвлөлийн хуралдаанаар хэлэлцээд, зөвлөлийн гишүүдээс гаргасан саналыг тусгаж, Улсын Ерөнхий Прокурорын тушаалаар батлаж, хэрэгжүүлж ажиллах нь зүйтэй гэж үзлээ.
Дорнод аймгийн прокурорын газарт хийсэн шалгалтын дүнг хуралдаанаар хэлэлцээд тус аймгийн прокурорын газар ажлаа сайжруулах талаар зарим ажлыг хийж гүйцэтгэсэн байна.
Тухайлбал: Гэмт хэргийн тухай гомдол мэдээллийг бүртгэл хяналтанд бүрэн авахуулж шалгуулж шийдвэрлэх ажиллагаа сайжирсан, хялбаршуулсан журмаар хэрэг шийдвэрлэх ажиллагаа өмнөх оныхоос өссөн, хэргийн хугацааг сунгаж шалгуулдаг явдал болон түдгэлзүүлсэн хэргийн тоо өмнөх оныхоос буурсан зэрэг ажлын эерэг үзүүлэлтүүд гарсан байна.
Гэвч шүүхээс буцсан хэргийн тоо өссөн, архивын цахим бүртгэлийг бүрэн хөтлөөгүй зэрэг ажлын алдаа дутагдал цөөнгүй байна гэж шалгалтын ажлын хэсэг дүгнэжээ.
Шалгалтын дүнг үндэслэн прокуроруудыг оролцуулан эрүүгийн хэргийн зүйлчлэл, шүүхээс буцсан хэргийн шалтгаан үндэслэлийн талаар УЕПГ-ын Сургалт судалгааны төвөөс 2014 оны 3 дугаар улиралд сургалт явуулах нь зүйтэй гэж зөвлөлийн хуралдаанаас шийдвэрлэлээ.
“Прокурорын тухай хууль“-ийн төслийг хуралдаанаар хэлэлцэж зөвлөлийн гишүүдээс гаргасан саналыг тусгаж, холбогдох өөрчлөлтийг нэмэх, хуулийн төслийн талаар харъяа прокурорын газрын прокурор ажилтнуудаас санал авч боловсруулах зэрэг арга хэмжээг авахаар шийдвэрлэлээ.
