Орон даяар явагдаж буй Элсэлтийн ерөнхий шалгалт өнөөдөр өндөрлөнө. Хуваарийн дагуу өнөөдөр Физик, Нийгмийн тухай мэдлэг, Газар зүйн хичээлийн шалгалтуудыг зохион байгуулах юм.

Дашрамд хэлэхэд өнгөрсөн шалгалтуудад НМХГ-ын Боловсролын хяналтын улсын байцаагч нар хөндлөнгийн хяналт тавин ажиллаж хэд хэдэн зөрчлүүдийг илрүүлжээ.

Тухайлбал, “Энх-Орчлон” дээд сургууль дээр шалгалтыг сургалтын зориулалтын бус цайны газрын зааланд авч байсан бол, политехникийн коллеж дээр шалгалтын үед хүүхдийн дээрээс салхивч унаж, шил нь хагарч гэмтээсэн байна.

Мөн Улаанбаатар-Эрдэм дээд сургууль дээр хоёр материал дутуу ирсэн, ХААИС дээр шалгалтын материал тогтоол, протокол лацгүй ирсэн, А вариант хэвлэлийн алдаатай ирсэн, мөн энэ сургууль дээр нэг сурагч ахыгаа өөрийнхөө оронд оруулж байгаад баригдсан зэрэг зөрчлүүд гарсан байна. Түүнчлэн сургууль, эцэг эхийн зүгээс хайхрамжгүй хандаж шалгалт өгөх дээд сургуулийн байрыг сайн хэлж, автобус унааг зааж, өгөөгүйгээс хүүхдүүд төөрч будилах, элсэлтийн ерөнхий шалгалтын материалуудаа дутуу бүрдүүлж ирснээс шалгалтаасаа хоцрох үзэгдэл их гарсан аж.

Ерөнхий шалгалтын монгол хэл, бичгийн хичээлийн шалгалтад нийслэлийн зургаан дүүргээс 400 гаруй төгсөгчид ЭЕШ-д шалтгаангүйгээр ирээгүй байна.