Нийслэлийн Засаг дарга Э.Бат-Үүл, НИТХ-ын дарга Баттулга тэргүүтэй албаныхан өнөөдөр Үндэсний их баяр наадмын бэлтгэл ажилтай танилцлаа.

    Төв цэнгэлдэх зориулалтын түшлэгтэй сандалтай болно

Энэ жилээс Төв цэнгэлдэх хүрээлэнд хуран цугласан наадамчид зориулалтын түшлэгтэй сандал сууж наадамлах гэнэ. Ингэхдээ 13.600 сандал шинээр байрлуулахаар болсон бөгөөд сандлуудыг энэ сарын 24-нөөс суурилуулж эхлэх юм байна. Эдгээр сандлыг худалдан авахад нийт 200 сая төгрөг төсөвлөсөн аж.

Шинэ сандлуудыг байрлууснаар нийтдээ 15 орчим үзэгч төв цэнгэлдэхэд наадам үзэх боломжтой болох юм. Харин наадмын тасалбарыг хэдэн төгрөгөөр худалдах нь тодорхойгүй байгаа аж.

Хүй долоон худагт бүтээн байгуулалт үргэлжилсээр

Өнөө жилийн наадмын төсөв 700 гаруй сая төгрөгөөр нэмэгдсэн нь Хүй долоон худагт бүтээн байгуулалт хийгдэж эхэлсэнтэй холбоотой. Тухайлбал, өнгөрсөн онд барьсан 5300 машины зогсоол дээр нэмж 500 машины зогсоол барьж байгаа юм. Мөн яг морь барианы хагуу талаар 3000 ширхэг сандал суурилуулж, Хүй долоон худаг дахь шороон замуудыг асфльт болгохоор ажиллаж байгаа аж.

Мөн 2020 он хүртэл хэрэгжүүлэхээр төлөвлөсөн “Монгол наадам” цогцолборын бүтээн байгуулалтын хүрээнд ажилчдын байр, өвөл зуны агуулахыг барьж эхэлжээ. Хүй долоон худагт тулгардаг томоохон бэрхшээлүүдийн нэг бол бие засах газар. Иймд энэ жил бие засах газрын тоог долоогоор нэмж, 31 болгожээ. Мөн бохир зөөх машины тоог хоёр дахин нэмэгдүүлж, 10 болгосон тул энэ жил бие засахад ямар нэгэн хүндрэл учрахааргүй болсон байна.

Түүнчлэн хүй долоон худагт таван ширхэг “Эко” автобус гарган ажиллуулах бөгөөд уг автобус “Railbus”-аар зорчиж, Давааны өртөөнд буусан иргэдийг морь барианы газар руу зөөх юм. Хүй долоон худагт дахь бүтээн байгуулалтын ажил ирэх сарын 5 гэхэд дуусах гэнэ.