Нийслэлийн тээврийн газраас шөнийн тээврийг үйлчилгээг энэ сарын 14-ний өдрөөс эхлэн хэрэгжүүлж эхэлсэн билээ. Энэхүү шөнийн үйлчилгээнд троллейбус “Ханын материалын комбинат-Офицеруудын ордон”, том оврын  автобусны “7 буудал-МУБИС” чиглэл, “Нисэх-МУБИС” чиглэлүүдэд үйлчилж байгаа. Өөрөөр хэлбэл, нийтдээ найман тээврийн хэрэгсэл 22:00-02:00 цаг хүртэл нийслэлчүүддээ үйлчлэх бөгөөд том хүн 1000 хүүхэд 200 төгрөгөөр зорчих юм байна.

Энэ талаар Нийслэлийн тээврийн газрын Хамтын ажиллагаа маркетингийн тасгийн ахлах мэргэжилтэн Г.Алтанцэцэгээс дараах зүйлийг  тодрууллаа.

-Нийслэлийн иргэд шөнийн цагаар нийтийн тээврээр үйлчлүүлэх боломжтой болсон гэсэн. Энэ талаар?
-Улаанбаатар хотын иргэд, зорчигчдын хүсэлт, шөнийн цагаар зорчих эрэлт хэрэгцээг Нийслэлийн Тээврийн газраас судалсанаар шөнийн нийтийн тээврийн үйлчилгээг  энэ сарын 14-ний өдрөөс эхлүүлсэн. Өдөр бүриийн 22.00-02.00 цагийн хооронд шөнийн тээвэрлэлт хийгдэнэ. Ингэхдээ 30-35 минутын зайтай нийслэлчүүдэд үйлчилнэ. Том хүн 1000, хүүхэд 200 төгрөгөөр зорчино.

-Шөнийн тээврийн үйлчилгээ хэдэн чиглэлд үйлчилж байгаа вэ?
-Үндсэндээ гурван чиглэлд үйлчилж байгаа. Троллейбусны Тр:2 буюу ”Ханын материалын комбинат-Офицеруудын ордон”, их багтаамжийн автобусны М/ШҮ/: “7 буудал-МУБИС” чиглэл, М/ШҮ/: “Нисэх-МУБИС” чиглэлүүдийн нийт найман тээврийн хэрэгсэл  явж байна. Ханын материалын комбинат-Офицеруудын ордон чиглэлийн автобус Энхтайвны өргөн чөлөө буюу төв магистрал шугамаар явна. Үйлчилгээнд Цахилгаан тээвэр компанийн тээврийн хэрэсглүүд иргэдэд үйлчилж байгаа.

-Энэхүү үйлчилгээ эхлээд нэлээн хэд хоночихсон байна. Иргэд эдгээр чиглэлүүдийн автобусаар хэр үйлчлүүлж байна вэ?
-Шөнийн тээврийн үйлчилгээ эхлээд долоо хонож байна. Өнгөрсөн хугацаанд ажиглаж байхад иргэдэд зориулаад энэхүү үйлчилгээг гаргаж  байгаа. Харин энэ чиглэлийн нийтийн тээврээр үйлчлүүлэх нь тааруу байна. Тэгсэн хэрнээ хувийн буюу хулгайн тээвэрт илүү мөнгө төлөөд үйлчлүүлээд байгаа. Гэхдээ Ханын материалын комбинат-Офицеруудын ордон чиглэлийн автобусаар иргэд арай илүү үйлчлүүлж байна. Харин 7 буудал-МУБИС чиглэлд шөнийн зорчигч урсгал үнэхээр муу байгаа. Тиймээс иргэд найдвартай, хямд үнээр нийтийн тээвэрт сууж үйлчлүүлж байхыг уриалж байна.

-Зуслангийн үйлчилгээнд хэчнээн чиглэлд нийтийн тээврээр үйлчилж байгаа вэ?
-Урин дулааны улирал болж нийслэлийн иргэд зусландаа гарч байгаатай холбогдуулан зуслангийн чиглэлийн замын хөдөлгөөн ажлын өдрүүдийн оройн цаг, амралтын өдрүүдэд ачаалал ихтэй болдог. Тиймээс Нийслэлийн тээврийн газраас энэ сарын 9-ний өдрөөс эхлэн зуслангийн долоон иглэлд их багтаамжийн болон микро автобусуудыг явуулж байгаа. Тодруулбал, гурван чиглэлд их багтаамжийн автобусаар, дөрвөн чиглэлд туслах шугамын миро автобус үйлчилж байгаа. Гэтэл зуслангийн үйлчилгээгээр иргэд мөн л хангалтгүй үйлчлүүлж байна. Учир нь хувийн буюу хулгайн тээврийн хэрэгслээр 2-3 мянган төгрөг төлөөд үйлчлүүлээд байгаа. Гэхдээ нийтийн тээврийн үйлчилгээ нийгмийн захилгат үйлчилгээ юм. Тиймээс зуслангууд татан буугдах хүртэл учир хэдэн хүнтэй ч байсан үйлчлэх ёстой учир үйлчилгээ үргэлжлүүлж л байгаа.

-Зуслан руу явж буй автобусны буудал нь хаана байгаа вэ. Үнэ тариф нь ямар байгаа вэ?
-Их багтаамжийн автобусууд Гүнт-Жигжид- Тэнгис кино театр, Гоодой- Тэнгис кино театр, Баянбулаг- Тэнгис кино театр чиглэлүүдэд Долоон буудлаас Майхантолгой, Яргайтын богино, Яргайт, Хуурай мухарын чиглэлд бага багтаамжийн автобус үйлчилж байна. Үнэ тарифын хувьд том хүн-600, хүүдэд-200 төгрөгөөр зорчиж байгаа.