Эрүүл мэндийн дэд Ж.Амарсанаа өнөөдөр БНСУ-д зүрхний хагалгаанд орох зургаан хүүхдийг Солонгосын "Сэлвэшн Арми" ТББ-ын Монгол дахь албан ёсны төлөөлөгчийн хамт хүлээн авч уулзлаа. Төрөлхийн зүрхний цоорхойтой эдгээр хүүхдүүд "Сэлвэшн Арми" ТББ-аас манай улсад хэрэгжүүлсэн төсөлд хамрагдсан бөгөөд хагалгааны төлбөрийг тус байгууллага 100 хувь даадаг аж.
Ансан хотын “Танвон” эмнэлэгт зүрхний хагалгаанд орохоор болсон хүүхдүүд энэ сарын 25-нд буюу маргааш хүлгийн жолоо залах юм.
Дэд сайд энэ үеэр “Тус хагалгааны төсөв бүрдэхдээ Солонгост өвөл 12 сарын 1-31-ны хооронд нэг сарын турш хурдны замын төлбөр хураах цэг дээр сайн дурын ажилтнууд хандивын сав барин хандив цуглуулснаар бүрэлддэг. Энэ их хүч хөдөлмөр зарцуулсаны үр дүнд манай улсын зайлшгүй эмчилгээ, хагалгаа хийлгэх шаардлагатай байгаа хүүхэд багачуудад итгэлийн гараа сунган эмчлүүлж өгч байгаад гүнээ талархал илэрхийлж байна” гэлээ.
Тус үйл ажиллагаа нь Монгол төдийгүй Хятад, Киргиз, Филлипин зэрэг Зүүн өмнөд азийн нийт 30-40 хүүхдийг жил бүр эмчилдэг байна. Энэ жилийн хувьд БЗД-ээс 3 хүүхэд, Төв аймгийн 3 хүүхэд нийт 6 хүүхэд сонгогдон БНСУ-руу эмчилгээнд явж хагалгаанд орохоор болсон юм.
Мөн дэд сайд Ж.Амарсанаа "Сэлвэшн Арми" ТББ-ын Монгол дахь төлөөлөгчийн газар нь манайд үнэ төлбөргүй өдөр өнжүүлэх цэцэрлэг, өндөр настнуудын халамжийн төв, Бейсболын анги, хөгжлийн бэрхшээлтэй хүүхдийн цэцэрлэг зэргийг байгуулан үйл ажиллагааг явууж байгаад ЭМ-ийн дэд сайд, НИТХ-ийн төлөөлөгч болоод хувь хүнийхээ зүгээс маш их талархаж байгаагаа хэлээд "Монгол улсын маань ирээдүйн эзэд бяцхан хүүхдүүдэд эрүүл саруул болон ирж эх орондоо хэрэгтэй, мэдлэг боловсролтой иргэд болон төлөвшөөрэй" хэмээгээд гарын бэлэг гардууллаа.
