Уулын баяжуулах “Эрдэнэт үйлдвэр”-ийн захиргааны өмнө жагсаал болжээ.

Тодруулбал тус үйлдвэрээс Эрүүл мэндийн шалтгаанаар 40 хувийн тэтгэвэрт гарсан хүмүүс зөрчигдөж буй эрхээ хамгаалан жагссан байна.

Тэд үйлдвэрийн удирдлагуудаасаа гурван зүйл шаардсаны дотор мэргэжлээс шалтгаалах өвчнөөр нас барсны 36 сарын тэтгэмжийг цаг тухайд нь гүйцэд өгөх, рашаан сувилалд амрах төсвийг нь танахгүй байх болон Эмнэлэг сувиллын албаны дарга Ж.Ганчимэгийг огцруулах асуудал ч багтжээ.

Учир нь өнөөдрийг хүртэл үйлдвэрийн эмнэлэг сувилалын алба тэдний эмчилгээ үйлчилгээг зан харьцаа, ёс суртахууны ихээхэн доголдолтой хийж ирсэн гэнэ.

Эх сурвалжийн мэдээлж буйгаар 40 хувьтнуудын төлөөллийг Нийгмийн асуудал эрхэлсэн захирал С.Сувдаа хүлээн авч уулзсан байна. Тэдний шаардлага болох нөхөн олговор болон амралт рашаан сувиллын төсвийг хасахгүй байхаар асуудлыг шийдвэрлэхээ илэрхийлсэн аж. Харин Эмнэлэг сувиллын албаны дарга Ж.Ганчимэгийг огцруулах асуудлыг “Эрдэнэт үйлдвэр” ХХК-ийн ерөнхий захиралд мэдэгдэж, хариу өгнө гэсэн байна.

Жагсагчид дээрх асуудлуудаа аймгийн засаг дарга болон аймгийн ИТХ-даа тавьсан боловч үйлдвэрийн дотоод асуудал хэмээжээ. Тиймээс тэд энэхүү жагсаалыг зохион байгуулсан бөгөөд хэрэв шаардлагыг нь хүлээн авахгүй бол тэмцлийн дараагийн шатанд шилжинэ гэдгээ мэдэгдлээ.