Энэ сарын 21-нд Төв аймгийн Эрдэнэ сумын нутаг, Баяндавааны замд
Сүхбаатараас Улаанбаатарын чиглэлд явсан хот хоорондын зорчигч тээврийн
автобус осолдон зургаан хүн нас барж, 40 гаруй хүн гэмтэж бэртсэн
харамсалтай хэрэг гарсан. Өдгөө гэмтэж бэртсэн зорчигчид ГССҮТ-д эмчлүүлж байгаа бол автобусны жолооч нар саатуулагдаад байгаа юм. Тэгвэл яг осол гарах үед автобусыг жолоодож явсан ээлжийн жолооч С.Болдбаатарын биеийн байдал сайнгүй байгаа гэнэ.
Үүнтэй холбоотойгоор Сүхбаатараас сонгогдсон УИХ-ын гишүүн М.Зоригт Хорих 461-р ангийн удирдлагуудад хүсэлт хүргүүлжээ. Ингээд түүний хүсэлтийг бүрэн эхээр нь хүргье.
ШШГЕГ-ЫН ХАРЪЯА УРЬДЧИЛАН ХОРИХ 461 ДҮГЭЭР АНГИЙН ЗАХИРГААНД
Хүсэлт хүргүүлэх тухай
УИХ-ын гишүүн миний сонгогдсон тойрог Сүхбаатар аймгийн иргэний зорчигч тээврийн Баруун-Урт – Улаанбаатар чиглэлийн СҮА 0522 улсын дугаартай Аэро сити маркийн автобус 2014.06.21-ний өдөр зам тээврийн осолд орж, ослын улмаас 6 хүн амь насаа алдаж, 29 хүн ГССҮТөвд, 1 хүн Налайх дүүргийн нэгдсэн эмнэлэгт хэвтэн эмчлүүлж, ээлжийн жолооч С.Болдбаатар ШШГЕГ-ын харъяа урьдчилан хорих 461 дүгээр ангид цагдан хоригдож байна.
Осол аваар, эндэгдэл гэдэг санаатайгаар хүсэж ирдэг зүйл биш гэнэтийн нөлөөлөх хүчин зүйлгүй тохиолдол байдаг билээ. СҮА 0522 улсын дугаартай Аеро сити маркийн зорчигч тээврийн автобусны ээлжийн жолооч Содномдаржаа овогтой Болдбаатар нь өөрөө гэмтэлийн бэртэлтэй, бие нь таагүй байгаа тухай мэдээлэл УИХ-ын гишүүн надад ирлээ.
Иймд ослын шалтгаанаар шүүх, хяналтын байгууллагаас ял оногдуулаагүй байгаа энэ тохиолдолд Монгол Улсын “Сэжигтэн, яллагдагчийг баривчлах, цагдан хорих шийдвэрийг биелүүлэх тухай” хуулийн 17.1.10, мөн хуулийн 25.3-т заасны дагуу цагдан хоригдож байгаа ээлжийн жолооч, Монгол улсын иргэн С.Болдбаатар-т зохин журмын дагуу эмнэлэг, эрүүл мэндийн үйлчилгээг шуурхай үзүүлнэ үү.
Хүндэтгэсэн УЛСЫН ИХ ХУРЛЫН ГИШҮҮН М.ЗОРИГТ
24tsag.mn
Сэтгэгдэл (10)