Зуны улирал болж хаа сайгүй бүх зүйл ногоорч, өнгө алагласан цэцэгсээр хүрмэн ногоон дээлээ гоёсон орчинд их хотын иргэд бид зусах ёстой байдаг. Гэвч ногоон байгууламж, цэцэрлэгт хүрээлэн аль аль нь тийм ч олон байдаггүй талтай. Харин үүний оронд зам засвар, барилгын ажил  хийгдэж, иргэдийн зуны харшил, нүдний үрчлээг нэмэж орхидог.

Тэгвэл энэ жилээс манай улсад цэцэрлэгт хүрээлэн, тохь тухтай орчинг бүрдүүлэх зорилготой багагүй ажлууд хийгдэж буй сурагтай.     Тиймээс бид энэ удаагийнхаа сурвалжлагаар нийслэл хотод хийгдэж буй цэцэрлэгт хүрээлэн, тохижилтын ажлын эргэн тойрны талаарх мэдээллийг бэлтгэлээ.

Чулуун овооноос Амгалан хүртэлх замын дунд ногоо байгууламж хийхээр төлөвлөжээ

Тасганы овоо цэцэрлэгт хүрээлэн Дэлхийн банкны санхүүжилтээр хийгдэх бөгөөд зураг төсөл нь дуусах шатандаа орсон бол  Хамбын овоо, Мөрөөдлийн цэцэрлэгт хүрээлэн хоёрын зураг төслийн ажил хүлээлгэж өгөх шатандаа явж байгаа гэнэ.

ТЭЦ-4 цахилгаан станцын урд талд баригдах Мөрөөдлийн цэцэрлэгт хүрээлэн 53 га газар бүхий талбайтай байх бол Тасганы овоо 17 га, харин уг гурван байгууламжийн хамгийн том нь болох Хамбын овооны цэцэрлэгт хүрээлэн 150 га талбайтай залуучуудын чөлөөт цагаа зөв зохистой өнгөрөөх нэгэн ногоон байгууламж шинээр нэмэгдэж байгааг дуулгахад тун таатай байна. Үүнээс гадна өнгөрөгч онд эхэлсэн есөн жижиг хэмжээний тохижилтын ажлууд ирэх долдугаар сард бүрэн ашиглалтад орохоор төлөвлөгдсөн байгаа гэнэ.

Ногоон байгууламжийн тохижилтын ажил хэрхэн хийгдэж байгаатай танилцахаар Тасганы овоог зорьсон юм. Гандантэгчилэн хийдийн зүүн талд байрлах Гэсэр сүмийн Тасганы овооны тохижилтын ажил хараахан эхлээгүй байна. Тиймээс холбогдох албаныхнаас тодруулахад зургийн ажлыг хийж дуусгаад гүйцэтгэлийн тендер зарласан байгаа гэв. Харин уг газрын замын эсрэг талд өнгөрсөн жил ногоон байгууламжийн ажил хийгдсэн. Харин энэ удаад нөхөн сэргээлт, арчилгааны ажил ид хийгдэж байлаа. Биднийг очиход тэнд 26 цэцэрлэгч ажиллаж байсан юм.

Тэдэнтэй уулзаж зарим зүйлийг тодруулж байхад энэ жил Нийтийн үйлчилгээний Улаанбаатар нэгтгэл цэцэрлэгчдээ тусгай сургалтанд хамруулан мэргэжлийн цэцэрлэгчид бэлтгэн авсан талаар онцолсон юм. Эндэхийн ажил өнгөрсөн долоо хоногоос эхлээд явагдаж байгаа бөгөөд хийх ёстой ажлынхаа 45 хувийг хийж гүйцэтгээд байгаа гэнэ.

Нийтийн үйлчилгээний Улаанбаатар нэгдлийн инженер Г.Болдбаатараас хариуцан ажиллаж буй Тасганы овоо орчмын тохижилтын ажлынх нь талаар нь тодруулахад “Өнгөрсөн жил энэ газарт ногоон байгууламжийн ажил хийгдсэн. Харин энэ жил бид нөхөн сэргээлтийн ажил хийж байна. Бид улсын баяр наадмаасс өмнө хариуцан ажиллаж байгаа бүх ногоон байгууламжийн ажлуудыг дуусгаж, хүлээлгэн өгөх төлөвлөгөөтэй байгаа” гэсэн юм.

Ер нь ногоон байгууламжийн ажил долдугаар сарын дунд үе хүртэл хийгддэг ажээ. Харин түүнээс хойш арчилгааны ажил хийгддэг байна. Нийтийн үйлчилгээний Улаанбаатар нэгтгэл энэ жил Энхтайвны өргөн чөлөө, Чингисийн өргөн чөлөө болон хотын төвийн томоохон гудамжуудад ногоон байгууламж байгуулахаар авчээ. Мөн Нийслэл хүрээ өргөн чөлөө буюу Үндэсний цэцэрлэгт хүрээлэнгийн ард талд, зүүн дөрвөн замаас Офицеруудын ордон хүртэлх, Саппорогоос Таван шар, Саппорогоос баруун дөрвөн зам хүртэлх замуудад ногоон байгууламжийн нөхөн тарилт хийхээр зургаан бригад ажиллаж байгаа юм.

Харин орон сууцны дундах буюу байшин хороолол, гэр хороолол дундах ногоон байгууламж, тохижилтыг дүүргүүд хариуцан гүйцэтгэж байгаа юм байна. Мөн ногоон байгууламж, цэцгэн мандлыг арчлах, хамгаалах асуудлдыг дүүргүүд өөрсдөө хариуцах аж. Энэ жилийн хувьд Сонгинохайрхан дүүрэгт 250 сая, Чингэлтэй дүүрэгт 330 сая, Хан-Уул дүүрэгт 380 сая, Налайх дүүрэгт 50 сая, Багануур дүүрэгт 50 сая, Баянгол дүүрэгт 460 сая, Сүхбаатар дүүрэгт 990 сая, Баянзүрх дүүрэгт 430 сая, Багахангай дүүрэгт 20 сая төгрөгөөр цэцэгжүүлэлт, ногоон байгууламжийн ажил хийх юм.Түүнчлэн ногоон байгууламжтай холбоотой иргэдийн сэтгэл дундуур байдаг нэг асуудал бол жил бүр нэг наст ургамал тарьдаг явдал. Манайх шиг эрс тэс уур амьсгалтай оронд энэ нь нэг л зуны настай байдаг бөгөөд ирэх жил нь дахиад шинээр суулгахаас өөр аргагүйд хүрдэг. Тиймээс хотын ногоон байгууламжинд олон наст ургамлыг тарихаар судалж үзжээ. Гэхдээ хотын тохижилт, өнгө үзэмжийг илтгэдэг ургамлууд ихэнхдээ 1-2 настай ургамлууд байдаг байна. Олон улсын жишигт ч ийм аж. Харин зүлэгний хувьд энэ жил олон наст зүлгийн үрийг тарихаар болжээ.