Нийслэлийн прокурорын газрын Мэдээлэл, дүн шинжилгээ, бодлого төлөвлөлтийн хэлтсээс санаачлан  “Нийслэл, Дүүргийн прокурорын газрын Мэдээлэл, дүн шинжилгээ, бодлого төлөвлөлтийн ажил хариуцсан прокуроруудын хамтарсан зөвлөгөөн”-ийг зохион байгуулсан байна.

Анхны зөвлөгөөнөөр тус прокурорын газраас боловсруулж гаргасан “Мэдээлэл, дүн шинжилгээ, бодлого төлөвлөлтийн ажил хариуцсан прокуроруудаас цахим бүртгэлд дүн шинжилгээ хийхэд анхаарах асуудлууд”-ын тухай зөвлөмжийг хэрхэн хэрэгжүүлэх, Прокурорын байгууллагын дотоод практик сургалт болон дотоод ажлын өдрийг хэрхэн зохион байгуулах зэрэг асуудлуудыг хэлэлцэж, прокуроруудад мэргэжил арга зүйн туслалцаа, зөвлөгөө, чиглэл өгчээ.

Уг хамтарсан зөвлөгөөн нь цаг үеэ олсон, ажлын хэрэгцээ, шаардлагад нийцсэн ажил болсон тул цаашид тогтмол хугацаанд буюу улирал бүр зохион байгуулахаар тогтжээ.

2014 оны 06 дугаар сарын 27-ны өдөр Нийслэл, Дүүргийн прокурорын газрын Мэдээлэл, дүн шинжилгээ, бодлого төлөвлөлтийн ажил хариуцсан прокуроруудын хамтарсан зөвлөгөөнийг өргөтгөсөн хэлбэрээр дахин зохион байгуулж, тодорхой асуудлуудыг авч хэлэлцсэн байна.

Энэ удаагийн хамтарсан зөвлөгөөнд мэдээлэл, дүн шинжилгээ, бодлого, төлөвлөлтийн ажил хариуцсан прокуроруудаас гадна Нийслэл, дүүргийн прокурорууд, тэдгээрийн орлогч, туслах прокуроруудыг оролцуулжээ.

Нийслэлийн прокурор, хууль цаазын итгэмжит зөвлөх Б.Бат-Орших хамтарсан зөвлөгөөнийг нээж, энэхүү зөвлөгөөний ач холбогдол, үр дүнгийн талаар болон мэдээлэл, дүн шинжилгээ, бодлого төлөвлөлтийн ажил хариуцсан прокурорууд, мөн дүүргийн прокурорын газруудын удирдлагаас анхаарч ажиллах асуудлуудын талаар хэлж, тодорхой үүрэг чиглэл өгсөн ба зөвлөгөөнд оролцож буй нийт прокуроруудад ажлын амжилт хүсэн, идэвхи зүтгэл гаргаж санаачлагатай ажиллахыг тэмдэглэн хэлжээ.

Энэ удаагийн хамтарсан зөвлөгөөнд Удирдлагын академийн Менежментийн тэнхимийн ахлах багш Ц.Өнөржаргалыг урьж оролцуулан, “Орчин үеийн менежментийн хандлага, байгууллагын төлөвлөлтийн арга зүй” сэдвээр 2 цагийн сургалт явуулсан байна.

Мөн Нийслэлийн прокурорын газрын Мэдээлэл, дүн шинжилгээ, бодлого төлөвлөлтийн хэлтсээс боловсруулж гаргасан “Шалгалт хийхэд анхаарах асуудлууд”-ын тухай зөвлөмжийг хэрхэн хэрэгжүүлж ажиллах талаар орлогч прокурор Д.Баянжаргал танилцуулсан ба энэ хүрээнд прокуророос хийх шалгалтын зорилго, үндэслэл, чиглэл, шалгалт хийх арга хэлбэр, шалгалтын дүнг гаргах, түүний мөрөөр авч хэрэгжүүлбэл зохих арга хэмжээнүүд, шалгалтын материалыг бүрдүүлж, архивын нэгж болгоход анхаарах асуудлууд, шалгалтыг цахим бүртгэлд хэрхэн бүртгэх, прокуророос шалгалт хийхэд бэлтгэх нь зэрэг асуудлуудаар арга зүйн зөвлөгөө өгчээ.

Нийслэлийн прокурорын газраас дээрх хамтарсан зөвлөгөөнөөр хэлэлцэж, заалт чиглэл, зөвлөгөө өгсөн асуудлуудыг үйл ажиллагаандаа хэрэгжүүлж ажиллахыг Нийслэл, дүүргийн прокурорын газрын нийт прокуроруудад даалгаж, зөвлөгөөний бичиг баримтыг Дүүргийн прокурорын газруудад албан бичгээр хүргүүлсэн байна.