Туул голын сав газрын захиргаанаас голын хамгаалалтын бүсэд шалгалт хийж, шөнийн эргүүл ажиллаад нэг сар өнгөрч буй аж.

Шөнийн эргүүл нь оройн 22.00-06.00 цаг хүртэл тусгай хамгаалалтын бүсэд ажилладаг бөгөөд үеэр олон зөрчил илэрсэн талаар өнөөдөр БОНХЯ-аас хийсэн мэдээллийн үеэр хэлсэн юм.

2014 оны 06 дугаар сарын 30-ны өдрийн байдлаар илэрсэн зөрчил:

- Гачуурт тосгоны суурьшлын бүсийн дагуу, Баянзүрхийн гүүрний баруун болон зүүн талд ахуйн чанартай хог хаягдал ихээр хаягдсан;

- Зайсангийн гүүрнээс Яармагийн гүүрний хооронд, Яармагийн гүүрнээс баруун тийш Дулааны 4 дүгээр цахилгаан станцын урд хэсгээр ахуйн болон барилгын хур хог хаягдал хаягдсан;

- Сонгинохайрхан дүүргийн 20 дугаар хорооны нутаг дэвсгэр Туул голын үерийн хамгаалалтын далангийн дагууд болон Туул голын онцгой хамгаалалтын бүсийн 265-291 дүгээр баганын хооронд ахуйн болон барилгын хатуу хог хаягдал хаягдсан;

- Гачуурт тосгоны орчимд байрлуулсан 47 дугаар багана хулгайд алдагдсан;

- СХД-ийн 20 дугаар хорооны нутаг дэвсгэрт байрлуулсан 283, 287 дугаар баганыг барилгын хатуу хог хаягдлаар дарсан;

- Сүхбаатар дүүргийн 1-р хороо Энхтайваны гүүрний доогуур урсах Сэлбэ гол (Дунд гол)-д Нийтийн үйлчилгээний Улаанбаатар нэгтгэлийн 26-13 УБН улсын дугаартай автомашин хаягдал бохир ус асгасан зэрэг олон зөрчил илэрчээ.

Эдгээрээс Нийтийн үйлчилгээний Улаанбаатар нэгтгэл рүү Байгаль орчин ногоон хөгжлийн сайдын албан тоот, Мэргэжлийн хяналтын газрын шаардлага хүргүүлсэн байна.  Үүгээр зогсохгүй дээрх зөрчил гаргасан тээврийн хэрэгсэл эзэмшигчдэд хариуцлага хүлээлгэх, тэднийг олон нийт зарлах, зарим гарцыг нь хаах хүсэлтийг Нийслэлийн цагдаагийн газар, Хан-Уул, Сонгинохайрхан дүүргийн Мэргэжлийн хяналтын хэлтэст хүргүүлээд байгаа аж.

Түүнчлэн амралт зугаалгын улирал эхэлсэнтэй холбоотойгоор иргэд голын усанд машинаа угаах явдал их гарч байгаа гэнэ. Тийм ч учраас Туул голын сав газрын захиргаанаас тэдгээр хүмүүсийг нарийн шалгаж машин жолоодох эрхийг нь хасах  арга хэмжээ авч байгаа юм байна.

Дашрамд дуулгахад Азийн хөгжлийн банкны санхүүжилтээр Туул голын бохирдлыг судлах ажил хийгдэж байгаа бөгөөд ирэх жилийн хоёрдугаар сард судалгааны дүн нь гарч бодит ажил болон хэрэгжиж эхлэх аж.

24tsag.mn