Монгол Улсаас Швейцарийн Холбооны Улсад суух Онц бөгөөд Бүрэн эрхт Элчин сайд В.Пүрэвдорж өчигдөр тус улсын Ерөнхийлөгч Эрхэмсэг ноён Дидиер Буркхалтерт Итгэмжлэх жуух бичгээ өргөн барив.

Элчин сайд В.Пүрэвдорж Ерөнхийлөгч Дидиер Буркхалтерт Монгол Улсын Ерөнхийлөгч Ц.Элбэгдоржийн халуун дотно мэндчилгээг уламжилж, Монгол, Швейцарийн уламжлалт найрсаг харилцаа, хамтын ажиллагааг улам бүр өргөжүүлэн хөгжүүлэхийн төлөө идэвхтэй ажиллах болно гэдгээ илэрхийлэв.

Итгэмжлэх жуух бичиг барих ёслолын дараагаар Ерөнхийлөгч Д.Буркхалтер Элчин сайд В.Пүрэвдорж нар хоёр талын харилцаа, хамтын ажиллагааны асуудлаар санал солилцов. Элчин сайд В.Пүрэвдорж хоёр талын найрсаг харилцаа, хамтын ажиллагаа Монгол Улс, Швейцарийн Холбооны Улс хооронд дипломат харилцаа тогтоосноос хойшхи сүүлийн хагас зуун жилд, ялангуяа Монгол оронд ардчилсан өөрчлөлт шинэчлэл эхэлсэн үеэс хойш идэвхтэй хөгжиж ирсэнийг тэмдэглэв.

Мөн тэрээр хоёр талын харилцааны агуулга баяжиж Швейцарийн Засгийн газрын хөгжлийн хамтын ажиллагааны төсөл хөтөлбөрүүд нь Монгол Улсын хөгжлийн тэргүүлэх чиглэлүүд болох ардчилсан тогтолцоог боловсронгуй болгох, хөдөө аж ахуйг хөгжүүлэх, хөдөөгийн хөгжлийг дэмжих, мэргэжлийн боловсролыг хөгжүүлэх, байгаль орчныг хамгаалах зэрэг чиглэлээр амжилттай хэрэгжиж байгаад талархалтай байдгаа илэрхийлэв.

Тухайлбал, Швейцарийн шууд ардчилал, орон нутгийн засаглалын өвөрмөц хэлбэр, туршлагыг судалж Монгол Улсад ардчиллын тогтолцоог бэхжүүлэх, засаглал дахь ард иргэд, иргэний нийгмийн оролцоог нэмэгдүүлэх асуудлаар төсөл хөтөлбөр хэрэгжүүлэх талаар хоёр тал үр дүнтэй хамтран ажиллаж байгааг Элчин сайд В.Пүрэвдорж дурдав. Түүнчлэн тэрээр хоёр орон НҮБ-ын болон бусад олон улсын байгууллагуудын хүрээнд ойр дотно хамтран ажиллаж ирснийг дурдаад Швейцарийн Холбооны Улс энэ жил Европын аюулгүй байдал, хамтын ажиллагааны байгууллагыг даргалж байгаад баяр хүргэж, амжилт хүсэв.

Ерөнхийлөгч Д.Буркхалтер Элчин сайд В.Пүрэвдоржид баяр хүргэж ажлын амжилт хүсч Монгол Улсын Ерөнхийлөгч Ц.Элбэгдорж, Гадаад харилцааны сайд Л.Болд нарт чин сэтгэлийн халуун мэндчилгээ дэвшүүлж буйг нь уламжлахыг хүсэв. Мөн тэрээр Монгол Улсын Ерөнхийлөгч Ц.Элбэгдоржийн Монгол оронд ардчиллын тогтолцоог бэхжүүлэхийн төлөө хийж буй алхам, санаачилгыг нь өндрөөр үнэлж байдгаа илэрхийлэв.

Ерөнхийлөгч Д.Буркхалтер энэ жил хоёр орны хооронд дипломат харилцаа тогтоосны 50 жил, мөн Монгол Улс дахь Швейцарийн хөгжлийн хамтын ажиллагааны 10 жилийн ой тохиож буйг дурдаж, хоёр талын улс төр, хөгжлийн хамтын ажиллагаа идэвхтэй явагдаж буйд сэтгэл ханамжтай байгаагаа онцлохын хамт хамтын ажиллагааг эдийн засаг, худалдааны салбарт өргөжүүлэх нөөц бололцоо байгаа хэмээн үзэж байгаагаа тэмдэглэв.

Итгэмжлэх жуух бичиг гардуулах ёслолд Швейцарийн Холбооны Канцлер хатагтай Корина Касанова, Швейцарийн Ерөнхийлөгчийн Алба болон Гадаад хэргийн яамны төлөөлөгчид болон Монгол Улсын Элчин сайдын яамны ажилтнууд оролцов.