Үндэсний их баяр наадмын бэлтгэл ажилтай холбогдуулан өнөөдөр Хурдан морины салбар хорооноос мэдээлэл хийлээ.

Энэ жилийн улсын баяр наадамд тоосоо өргөх хурдан морины бүртгэл энэ сарын 9-нд эхлэх ба уралдаан уламжлал ёсоор болох гэнэ. Тодруулбал: 

-10-нд хязаалан, шүдлэн,
-11-нд азарга, их нас,
-12-нд соёолон, даага,
-13-нд эрлийз морьдын уралдаан болон уяачдын наадам, холч болон жороо морьдын уралдаан тус тус болно.

Унаач хүүхдийн хувьд 7-16 настай байхаар заасан бөгөөд ингэхдээ даатгалын гэрээ хийн хамгаалах хэрэгслээр иж бүрэн хувцасласан байх шаардлага тавьжээ. Мөн хүүхдийн насыг нэмж уралдуулахаас сэргийлж төрсний гэрчилгээ болон бусад бичиг баримтыг тулган бүртгэл хийх гэнэ.

Түүнчлэн энэ жилээс хурдан морины сэрвээний өндрийг тусгай лазер төхөөрөмжөөр хэмжин наадамчин олонд дэлгэцээр үзүүлэх бөгөөд морьдын сэрвээний өндрийг дараах байдлаар тогтоожээ.

-Азарга, соёолон 140 см,
-Их нас 141 см,
-Хязаалан 137 см,
-Шүдлэн 132 см,
-Даага 127 см дээш байвал тухайн насанд уралдуулахгүй.

Баяр наадмыг зохион байгуулах хороо энэ жил хүй долоон худагийн тохижилт үйлчилгээнд ихээхэн анхаарал хандуулсан бөгөөд тухайлбал, өнгөрсөн онд барьсан 5300 машины зогсоол дээр нэмж 500 машины зогсоол барьж байгаа юм. Мөн яг морь барианы хажуу талаар 3000 ширхэг сандал суурилуулж, Хүй долоон худаг дахь шороон замуудыг асфльт болгоод байна. Хүй долоон худагт тулгардаг томоохон бэрхшээлүүдийн нэг бол бие засах газар. Иймд энэ жил бие засах газрын тоог долоогоор нэмж, 31 болгожээ. Мөн бохир зөөх машины тоог хоёр дахин нэмэгдүүлж, 10 болгосон тул энэ жил бие засахад ямар нэгэн хүндрэл учрахааргүй болсон гэнэ.

Түүнчлэн хүй долоон худагт таван ширхэг “Эко” автобус гарган ажиллуулах бөгөөд уг автобус “Railbus”-аар зорчиж, Давааны өртөөнд буусан иргэдийг морь барианы газар руу зөөх юм.

Мөн хурдан морины гарааны уртыг сунгасан тул гараанаас морьд олон давхарлаж гардаг явдал гарахгүй бөгөөд наадамчин олныг уйдаахгүй байх үүднээс “Морьтны тоглолт”, “Шүхрийн буулт” үзүүлбэрүүд үзүүлэх аж.