Энэ жилийн наадмын үйл ажиллагааг нийт 2.2 тэрбум төгрөгөөр зохион байгуулж байна.

Үүнээс 946 сая төгрөгийг урлаг соёлын арга хэмжээ болон 3D шоунд зарцуулж байгаа аж. 3D лазер шоуг наадмын сүүлийн өдөр Чингисийн талбайд зохион байгуулагдаг уламжлалтай. Уг шоунд урлагийнхан ая дуугаа өргөдөг. Мөн залуус лазерын гэрэлд чөлөөт хөгжмийн хэмнэлд бүжиглэж нэг үдшийг өнгөрөөдөг юм. Тэгвэл энэ жил тус арга хэмжээний төсвийг нэг дахин нэмж нэг тэрбум орчим төгрөгөөр зохион байгуулах гэж байгаа нь энэ аж.  Гэхдээ уг арга хэмжээг иргэд шүүмжилж эхэллээ. Учир нь зөвхөн нэг оройны арга хэмжээнд ийм их хэмжээний мөнгийг зарцуулж буй нь төсвийн мөнгийг үргүй зарсан явдал. Түүнээс гадна улс орны эдийн засаг хямарч байхад энэ мэт шоу цэнгээнийг нэг тэрбум төгрөгөөр ивээн тэтгэж буй нь цагаа олоогүй ажил болж байна гэж үзэж байгаа аж.

Дээрхээс гадна наадмын төсвийн 2.2 тэрбум төгрөгөөс 921,2 сая төгрөгийг бай шагналд, 494 сая төгрөгийг тохижилт, үйлчилгээний зардалд, 142,5 сая төгрөгийг хэв журам хангах, онцгой байдлын зардалд, 333,9 сая төгрөгийг  наадмыг зохион байгуулах бусад арга хэмжээнд зарцуулж байгаа юм байна.