Эднийх олон үеийн малч удамтай айл аж. 1926 онд Маршл Х.Чойбалсангаас “Мянгант малчин”-ы тэмдэг авч явсан улсын сайн малчин Г.Мөнх гуай бол Монгол Улсын манлай уяач М.Данзаннямын аав аж. М.Данзанням гуай гүү барих өдөр гэртээ мэндэлжээ. Түүний мэндэлсэн өдөр адуутай холбоотой явах хувь заяаг нь зурж өгчээ. Хожим нь тэрээр улсын наадмын 6 түрүү, 10 айраг авчээ. Ингээд 1988 онд алдарт уяач болсон бол 2002 онд Манлай уяач цолыг нөхөн олгожээ. 6 түрүүнийхээ ихэнхийг азрагаар авч.
Энэ эрхэм хүний хүү бол Монгол Улсын хөдөлмөрийн баатар, Тод манлай, Гавъяат малчин, XX зууны манлай уяач Д.Даваахүү юм. Тэрээр “Ажнай хүрэн” азрагаа 4 түрүүлгүүлж, 1 айрагдуулжээ. Улсын наадмаас нийтдээ 21 түрүү, 43 айраг, “Их Хурд”-аас 2 түрүү авчээ.  Д.Даваахүү монголын хурдан морины олон шинэ амжилтыг бий болгожээ. Тухайлбал азарга, их насны түрүүг 3 удаа хамт авсан, 4 жил дараалан азарга түрүүлгэсэн, 1 жилд азарганы түрүү болон хоёр айргийг хамт авсан, төрийн их баяр наадмын азарганы түрүүг 10 удаа авсан гээд бишрэм түүхийг бичжээ.
Ийм алдар суутай хүмүүсийн гуравдахь үе өчигдөр улсын наадмын азраганы түрүүг авч Ардын хувьсгалын 93 жилийн их баяр наадмыг утга төгөлдөр болголоо. Д.Даваахүүгийн хүү Д.Баянбатын хонгор азрага улсын наадамд түрүүлж өвөө, аавынхаа адил азрагаар улсын наадмын түрүүг авч чадлаа. Д.Баянбат сүүлийн үед морь ихээхэн сойх болсон бөгөөд 2003 оны Дүнжингаравын хурд, Сэлэнгийн хурд-2010 бүсийн уралдаануудаас айраг авч байжээ.
Ийнхүү гурван үеэрээ улсын наадмаас азрагаар түрүү авсан явдал энэ жилийн наадмын нэг сонин хачин болох нь тодорхой боллоо. Тиймээс эдгээр алдарт уяачдын удмынхныг азрага мэддэг, “Азраганы хаан” гэр бүл гэж ярих шинэ нэршлийг бий болголоо.