Жил бүрийн үндэсний их баяр наадмаар монгол орны дөрвөн зүг найман зовхисоос малчдын төлөөлөл буюу уяачид Хүй мандлын ногоон дэвжээг сорин ирж, уясан хүлгийнхээ шандасыг сорьдог билээ. Хурдан морины уралдаан болж буй наадмын өдрүүдэд уяачдын ажил ид ундарч байдаг тул наадмын үндсэн үйл ажиллагаа өндөрлөсөний дараа газар газрын уяачдад зориулж Засгийн газраас уяачдын наадам зохион байгуулдаг юм.

Уяачдын наадамд тухайн жилийн түрүү бөх зочлох бөгөөд жороо морьдын уралдаан, гурван насны эрлийз адууны уралдаан, урлагийн тоглолт болдог билээ. Мөн наадмын үеэр  Үндэсний их баяр наадамд түрүүлсэн, үзүүрлэсэн, шөвгөрсөн бөхчүүдэд бай шагнал, цолны чимэг хүртсэн бөхчүүдэд үнэмлэх гардуулдаг юм.

Үндэсний их баяр наадмыг зохион байгуулах хорооны дарга, Монгол Улсын Шадар сайд Д.Тэрбишдагва уяачдын наадмыг нээж хэлсэн үгэндээ, "Монгол төрийн наадам дэлгэр сайхан боллоо. Монгол ард түмэн ийнхүү өв тэгш цэнгэн наадахад уяач та бхүний хувь нэмэр өгүүлшгүй их. Малч монгол ухаан, өв соёлоо тээж, түгээн дэлгэрүүлж яваа эрхэм та бүхний уясан морь хурдан, унасан хүүхэд нь сэргэлэн байг" хэмээн онцоллоо.

Одоогоор уяачдын наадмын албан ёсны нээлт болж, хүчит бөхийн барилдааны нэгийн даваа үргэлжилж болон эрлийз бага наны морьд гарааны зурхай руу хөдлөөд байна. Харин өглөө Эрлийз хурдан морьдын дээд нас буюу азарга, их нас, соёолон  морьд, дунд нас буюу шүдлэн, хязаалан  морьд уралдсан юм. Уг уралдааны цувааг нэгтгэн хүргэх болно.