Сүүлийн жилүүдэд улс төрчид, бизнес эрхлэгчид хурдан моринд бүхнээ зориулж эхэлсэн. Энэ нь нэг талаараа морин спортыг хөгжүүлэхэд зориулж хөрөнгө оруулалт хийж байгаа сайн талтай. Нөгөө талаараа Монголын хамаг хурдан буянг мөнгө, эрх мэдлээрээ худалдаж авчихаад наадамд түүнийгээ хурдлуулж өөрсдийгөө баясган, өөр хоорондоо өрсөлддөг болов. Мэдээж шилдэг ажнай хүлгүүд учир алтан жолоогоо алдахгүй өргүүлнэ. Бас өвөлжин бордож, хүчтэй эм тариа хэрэглэдэг гэсэн шүүмжлэл ч дагуулдаг. Ингээд жирийн ардын задгай бэлчээр дэхь хүлгүүд дарга нарын дөрвөн улиралд хашаанд тэжээлэгддэг хүлгүүдтэй уралдахад улам л төвөгтэй болж байна. Тиймээс л жирийн ардын наадам уу? дарга нарын наадам уу гэж асуухад хүргэв. Одоогийн УИХ-д л гэхэд Г.Батхүү, М.Энхболд, Ч.Улаан, Х.Наранхүү, Су.Батболд, Ц.Даваасүрэн, Д.Бат-Эрдэнэ, Х.Баттулга, Ж.Батзандан, Д.Батцогт гээд олон уяачид бий.

314 их наснаас айргын дөрөвт хурдалсан Дундговь аймгийн Хулд сумын уугуул, аймгийн Алдарт уяач С.Мөнхбатын хүрэн давхив. Уг хүлгийг БХБЯ-ны ТНБ-ийн дарга Ц.Ганхүүгийнх гэж эх сурвалж тодотгов. Тэрээр МАН-ын Бага хурлын гишүүн. Өөрөө ч наадмын талбайд улаан дээл өмсчихсөн айрагдсан хүлгийн тоосоо хусан олон нийтэд яриа өгөн реклам хийхээ мартсангүй.

Улс төрчдийн дундаас ГОК-ийн захирал, ҮХЯ-ны сайд асан Ч.Ганзориг нэг хэсэг хурдан морийг нилээд уядаг байсан. Харин тэрээр энэ ажлаа сүүлийн жилүүдэд өөрийн хүүдээ шилжүүлжээ. Түүний хүү Г.Тэмүүлэн ихэвчлэн эрлийз адуу уралдуулдаг. Энэ жил түүний сойсон халтар соёолон түрүүлж Архангайчуудыг баясгав. Г.Тэмүүлэн нь МАН-ын Бага хурлын гишүүн бөгөөд НАМЗХ-ны дэд Ерөнхийлөгчийн албатай гэж эх сурвалж тайлбарлав. Монголын уул уурхайн бодлого дээр үе удам дамжин суурьшиж байгаа энэ залуу их азтай наадлаа.

АН-ын дарга нарын морь ч бас айраг амслаа. Үйлдвэр хөдөө, аж ахуйн дэд сайд Ц.Тувааны хул шүдлэн энэ жил айргын гуравт торгон жолоо өргөлөө. Салбарын сайд гэсэндээ хурдан хүлэг олонтой бололтой. Урьд өмнө энэ эрхэм ямар ажил хийж байсан нь тодорхойгүй. Улс төрд бол “битүү морь” байж байгаад дэд сайд болоод гараад ирсэн. Ирэх жил ч бас олон хүлэг уяхаа найз нөхөддөө ярьж яваа сураг ирэв.

УИХ-ын гишүүн Ж.Батзандан төрсөн ахаа “МЦХ” ХК-ний захирлаар томилуулж чадсан. Ж.Бат-Эрдэнэ нь МАН-ын гишүүн юм. Өмнө Засгийн газрын агентлаг болох МТШХХ-ны даргаар ажиллаж байсан юм. Түүний уясан хул даага энэ жилийн наадамд дөрөвт хурдалж эзнээ баясгалаа. Ийнхүү ах дүүсээрээ нам дамжиж аль ч төрийн үед ажил албатай байдаг даргын даага өнгөтэй байлаа.