Тулгар төрийн 2223, Их Монгол Улсын 808, Ардын хувьсгалын 93 жилийн ой, Үндэсний их баяр наадамд түрүүлж, үзүүрлэсэн бөхчүүдэд хүндэтгэл үзүүлэх ёслол боллоо.

Энэ жилийн бөхийн барилдаанд түрүүлсэн Увс аймгийн Ховд сумын харьяат, “Увс нуур” дэвжээний бөх Улсын харцага Н.Батсуурь болон үзүүрлэсэн Завхан аймгийн харъяат Ш.Жаргалсайхан нарыг хүчтэй сайхан барилдаж нутаг усныхаа нэрийг дуурсгалаа хэмээн нутгийн зөвлөлөөс байр машинаар амжилтыг мялаалаа.
Өчигдөр Хүй долоон худагт болсон Уяачдын наадмын үеэр наадамд түрүүлж, үзүүрлэн, шөвгөрсөн бөхчүүдэд бай шагнал, цолны чимэгийг нь олгосон юм. Энэ дагуу Үндэсний их баяр наадмын зохион байгуулах хорооны дарга Д.Тэрбишдагва баяр наадамд түрүүлсэн бөхийн бай шагнал болох 15 сая төгрөгийг Улсын заан Н.Батсуурьт уяачдын баярын үеэр гардуулав.

Мөн энэ үеэр Увс аймгийн Улаанбаатар хот дахь нутгийн зөвлөлөөс саяхан хүүтэй болж, өрхийн тэргүүн болоод буй Н.Батсуурьт “Хүннү” хороолол дахь дөрвөн өрөө байрыг өглөө. Мөн  Үндэсний их баяр наадмын албан ёсны түншээр ажилласан Японы “Тоёота” компани өчигдөр мөн түрүүлсэн бөхийг байлсан “Ланд круизер-200” маркийн авто машиныг түүнд гардуулан өгсөн юм.

Харин энэ жилийн баяр наадамд үзүүрлэж, улсын гарьд цол хүртсэн Ш.Жаргалсайханд Завхан аймгийн Улаанбаатар хот дахь нутгийн зөвлөлөөс нь “Lexus-570” машины түлхүүр гардуулж, "Хүннү" хороололд гурван өрөө байраар мялаасан юм.