Энэ сарын 14-ны өдөр Сүхбаатар дүүргийн IV хорооны 40, 42, 44 дүгээр байр буюу бидний хэлж заншсанаар “Мэргэжилтний 20”-ийн байрны айлуудын дээврийн хэсэгт их хэмжээний гал гарсан. Үүний улмаас тус байруудын айлуудад их хэмжээний хохирол учраад байгаа юм. Одоогоор галын дүгнэлт гараагүй байна. Мөн хохирсон оршин суугчдын хохирлыг хэн, хэрхэн барагдуулах нь тодорхойгүй байгаа аж. Гал гарсны улмаас 3,4 дүгээр давхрын айлуудын тааз нурж, хананд цууралт өгчээ. Энэ талаар тус байрны оршин суугчид “Манай байрны дор үйлчилгээ явуулдаг аж, ахуй нэгжүүд болоод хоолны газруудаас болж тог ачааллаа дийлэхээ болиод гал гарсан гэж бодож байна. Үүнээс өөр зүйлээс болсон гэж бодохгүй байна. Байрны доор үйлчилгээ явуулдаг газрууд өдөр шөнөгүй цахилгаан ажиллуулснаас болж ойрын өдрүүдэд айлуудын гэрэл гэнэт унтарч, цахилгаан зуух цай ч буцалгаж чадахгүй байсан. Байрны дор үйлчилгээ явуулах эрхийг олгосноос болж иргэд иймэрхүү байдалтай болчихлоо” гэв. Мөн зарим оршин суугчид маш их гомдолтой байгаа учраас хохирлоо даруй барагдуулахыг хүсч байна гэлээ.