Нямсүрэнгийн Төмөрхуяг хэмээх 14 настай хурдан морь унаач хүү энэ сарын 11-ны өдөр  Ховд аймгийн  Дуут сумын наадмаар даага унажээ.  Харамсалтай нь тэрбээр уралдааны явцад дааганаасаа унаж, ухаан алдсан тул сумын эмнэлэгт хүргэгдсэн байна. Хүүг яаралтай аймгийн эмнэлэгт хүргэх шаардлагатай байсан ч  эмнэлэгийн машин шатахуунгүй байсны улмаас сумын эмнэлэгт нэг хонуулжээ.  Улмаар 7-р сарын 12-ны өдөр аймгийн нэгдсэн эмнэлэгт ирж тархины зүүн талын яс цөмрөлттэй, цус хуралттай гэсэн оноштойгоор яаралтай хагалгаанд орсон байна. Хүү өнөөдрийг хүртэл аймгийн нэгдсэн эмнэлэгийн мэс заслын тасагт ухаангүй хэвтэж байгаа юм.

Хүүгийн бие тааруу байхад наадмын зохион байгуулагчид болоод засаг дарга нь ямар нэгэн арга хэмжээ авахгүй өнөөдрийг хүрсэн байна. Тэр бүү хэл нэг хүүхдийн эрүүл мэндээр  наадчихаад байгаа наадмын зохион байгуулах комисс дахин уяачдын наадам зохион байгуулахаар төлөвлөөд байгаа ажээ. Энэ нь дахин унаач хүүхдийн эрүүл мэнд, амь нас хохирох вий гэсэн болгоомжлолыг олон нийтэд төрүүлээд байна.