Улаанбаатар хотод шинээр 52 байршилд гэр бүлийн хэрэгцээний газар өмчлүүлэх ажил иргэдийн дунд хүлээлт үүсгээд байгаа. Тэгвэл одоогоор бэлтгэл ажил хийгдэж байгаа тухай Хотын дарга Э.Бат-Үүл өнөөдөр болсон хэвлэлийн бага хурлын үеэр мэдээллээ.

52 байршилд цахимаар газар өмчлүүлэх журам өнгөрсөн зургадугаар сард батлагдсан бөгөөд газар хүссэн иргэдийг ирэх наймдугаар сарын 1-нээс бүртгэж эхлэх учиртай.

Үүнээс өмнө нийслэлд болон орон нутагт 0,07 га газраа өмчлөөд авчихсан иргэдийн мэдээллийг нэгтгэх ажил хийгдэж байгаа ч тодорхой шалтгааны улмаас удааширчээ. Тодруулбал Завхан, Сэлэнгэ аймгуудад газраа өмчилсөн нийслэлийн иргэдийн мэдээлэл ирэхгүй удааширсан бөгөөд тэд газар өмчлүүлэх ажил эхлэхээс өмнө мэдээллээ өгөхөө мэдэгдсэн байна.

“Газар өмчлөлийн цахим систем’’-ийг ашиглан иргэдэд газар өмчлүүлэх ажил эхний ээлжинд 5 байршилд явагдана. Үүнд:

1.    Баянзүрх дүүргийн 20 дугаар хороо Хожуулын ам    /909 иргэнд/
2.    Сонгинохайрхан дүүргийн 21 дүгээр хорооны Соёондын ам    /4189 иргэнд/
3.    Хан-Уул дүүргийн 12, 13 дугаар хороонд байрлах Эрдэнэтолгой    /869иргэнд/
4.    Багануур дүүргийн 4 дүгээр хороо Тариан булагийн 1-р хэсэг    /7504иргэнд/
5.    Баганхангай дүүргийн 2 дугаар хороо Бор-Үзүүр    /1483 иргэнд/

Эдгээр 5 байршилд газар өмчлөлийн ажлыг зохион байгуулахад нийт 1524 га газарт 14954 иргэн газартай болох юм.

Энэ үеэр Улаанбаатар хотын захирагч Э.Бат-Үүл “Газрын албаныханы зүгээс эхний ээлжинд газар өмчлүүлэх таван газрыг хашааны газар бүрээр дугаарласан байгаа. Иргэд цахим хаягаар ороод хашааны газраа сонгож бүртгүүлээд, эргээд онлайнаар гэрчилгээгээ хүлээн авах юм. Газар өмчлөл нь хуулиар 90 хоногт багтдаг бол цахимаар 25 хоногт багтан шийдвэрлэгдэж байгаа. Энэ газар өмчлөлийн ажил зөвхөн нийслэлд 2013 оны тавдугаар сарын 30-аас шилжиж ирсэн иргэдэд хамаатай юм. Орон нутгийн болон шинээр шилжиж ирж байгаа иргэд нийслэлд газар өмчлөх боломжгүй" гэлээ.

Түүнчлэн газар өмчлөх өргөдлөө гаргах хүсэлтэй боловч иргэний эрх үүргээ биечлэн хэрэгжүүлэх боломжгүй буюу хөгжлийн бэрхшээлтэй, өндөр настан, насанд хүрээгүй хүүхдүүд, интернет сүлжээнд холбогдоогүй зэрэг олон тооны иргэдийг хүсэлт гаргах боломжоор хангах зорилгоор итгэмжлэгдсэн төлөөллөөр дамжуулан хүсэлт гаргах боломжтой бөгөөд байршил тус бүрийн хүсэлт гаргах хугацаа нь хуанлийн 15 хоног байх гэнэ.
 
Байршил тус бүрд газар өмчлөхөөр бүртгүүлсэн иргэдээс цахим систем автоматаар сонголт хийх ба таны газар өмчлөхөөр сонгогдсон, эсхүл сонгогдоогүй талаарх мэдээллийг гар утас болон цахим шуудангийн хаягт илгээх юм.