Сэлэнгэ аймгийн прокурорын газрыг байгуулах шийдвэр анх 1934 онд гарч анхны прокуророор Д.Балган, мөрдөн байцаагчаар С.Сосор нар ажиллаж байсан бөгөөд тэдний хөдөлмөр зүтгэлээр тулгын галаа асаасан тус прокурорын газар нь  наян жилийн буурал түүхэндээ олон алдартанг эгнээнээсээ төрүүлэн гаргажээ.

Эдгээрээ Аймгийн прокурор агсан Д.Очирхуяг “МУ-ын гавъяат хуульч” цолоор, С.Сүрэн, Ш.Цэдэн, Ш.Чулуунбат, М.Данзан, Д.Дамдинсүрэн, Н.Цэрэннадмид, Ц.Түмэн нар төрийн дээд шагнал “Алтан гадас” одонгоор тус тус шагнагдаж байсан бөгөөд эдгээр буурлуудынхаа залгамж халааг түүчээлж яваа эрхэм прокурор, ажилтнууд маань түүхт 80 жилийн ойн босгон дээрээ төрийн дээд одон медиалаар энгэрээ цоолж баяр дээр баяр нэмсэн байна.

Тулгар төрийн 2223, Их Монгол Улсын 808, Ардын хувьсгалын 93 жилийн ой, Үндэсний их баяр  наадмыг тохиолдуулан Монгол Улсын Ерөнийлөгч Ц.Элбэгдорж 2014 оны 7-р сарын 3-ны өдөр 77 дугаар зарлиг гаргаж  Сэлэнгэ аймгийн Прокурорын байгууллагад олон жил үр бүтээлтэй ажиллаж, улс эх орон, ард түмнийхээ өмнө хийж бүтээсэн ажил, хөдөлмөр  зүтгэлээрээ тэргүүлсэн  тус аймгийн Орлогч прокурор хууль цаазын ахлах зөвлөх Баасанжавын  Нинж, өндөр настан Санжаагийн Сувд нарыг төрийн дээд одон медаль болох “Алтан гадас” одонгоор, мөн тус байгууллагад туслах прокуророор ажиллаж байгаад  өндөр настны тэтгэвэрт гарсан Аюушжавийн Цэнджав, үйлчлэгч Н.Алтаннавч нарыг “Хөдөлмөрийн хүндэт медаль”-аар тус тус шагнажээ.

 Ёслолын ажиллагаанд УЕП-ын Орлогч, төрийн хууль цаазын шадар зөвлөх Г.Эрдэнэбат оролцож шагнал гардуулсан ба тэрээр төрийн дээд одон медиалаар шагнуулсан өндөр настан, прокурор, ажилтнуудад хандаж цаашдийн ажил амьдралд нь  амжилт хүсчээ.

 Мөн Монгол Улсын Ерөнхий Прокурор Д.Дорлигжавын 2014 оны 07 дугаар сарын 01-ний өдрийн Б/98 тоот тушаалаар Сэлэнгэ аймгийн Сум дундын 1 дүгээр прокурорын газрын ахлах прокурор Б.Эрхэмбаатарыг “Прокурорын тэргүүний ажилтан”, Сум дундын 2 дугаар прокурорын ахлах прокурор Ю.Батсүх, хяналтын прокурор Д.Уранчимэг, туслах ажилтан Н.Алтанчимэг, жолооч Н.Цоморлиг нарыг “Прокурорын хүндэт тэмдэг”, Сум дундын 2 дугаар прокурорын газрын жижүүр Д.Дашдоржийг “УЕПГ-ын жуух бичиг”-ээр тус тус шагнасан байна.