Улаанбаатар хотын иргэдэд 52 байршилд газар өмчлүүлэх ажил энэ сараас  эхэлсэн. Ингэхдээ эхний таван байршилд цахимаар бүртгэл явуулж байгаа бөгөөд бүртгэл эхлээд  эхний долоо хонон дуусах дөхөж байна.

Бүртгэл umch.ub.gov.mn сайтаар явагдаж байгаа ч тус сайтад хандсан ихэнхи иргэд бүртгүүлж чадахгүй байгаа юм. Тухайлбал сайтын “Цахим бүртгэл” хэсэг рүү орох гэхэд маш удаан уншиж байгаад алдаа заах жишээтэй. Мөн удаа дараагийн оролдлогоор орж байгаа ч ямар нэгэн байдлаар гацалттай байгаа нь иргэдийг бухимдуулсаар байна. Түүнчлэн баталгаажуулах код утсанд нь ирсэн ч кодоо баталгаажуулж бүртгүүлэх гэхээр ямар ч хариу тайлбар ирэхгүй байгааг иргэд хэлж байна.

Мөн иргэдийг бухимдуулаад байгаа нэг зүйл “та өмнө нь гэр бүлийн зориулалтаар газар эзэмшиж байсан юм байна” гэх анхааруулга. Тэгвэл албаныхан энэ талаар ард иргэдэд дэлгэрэнгүй тайлбар хийж, аль болох газраа авах боломжийг нь бүрдүүлж өгөхийг зохион байгуулах хэрэгтэй байсан.  Гэвч тэгээгүйгээс зарим иргэд бухимдалтай байна. Учир нь бухимдаж буй ихэнх иргэд өмнө нь өөрийн нэр дээр газар эзэмшиж байгаагүй харин эцэг эх нь хамтран газар эзэмшигч гэдэг дээр бүртгүүлсэн байгаа юм.

Түүнчлэн,  өөрсдийн нэр дээр газар эзэмшдэг иргэд банкнаас зээл авахдаа гэр бүлийн бүх гишүүдээ газрыг хамтран эзэмшигч гэдгээр бүртгүүлсэн нь эргээд хүүхдүүдэд нь өөрсдийн нэр дээр газар эзэмших боломжийг хааж байгаа юм. Тэгвэл энэ байдлыг албаныхан бодолцож, адаглаад энэ талаарх тодорхой тайлбарыг иргэдэд ойлгомжтойгоор хүргээгүй нь олон хүний дургүйцлийг хүргээд байна.

Бүр тодруулбал, гэр бүлийн зөвхөн эцгийнх нь нэр дээр газар бүртгэлтэй байдаг ч банкнаас зээл авахын тулд бүх хүүхдүүдээ хамтран эзэмшигчээр бүртгүүлчихсэн тохиолдолд тэд цахимаар газар авч чадахгүй болоод буй юм. Тэгэхээр нэг гэр бүл тэр чигээрээ цахимаар газар олгох энэ ажиллагаанд оролцож чадахгүй хохирч үлдээд байна.

 Газар өмчлүүлж эхэлснээс хойших эхний гурав хоногийн дотор 70 мянга илүү хүн цахимаар газар өмчлөхөөр захиалгаа өгсөн. Эдгээр хүмүүсээс 15000 орчим нь л эхний ээлжинд газраа өмчлөх боломжтой.

Монгол Улсад анх удаагаа цахимаар газар олгож эхэлж буй энэ үйл ажиллагаанд гарч буй хүндрэлүүд хийгээд иргэдийг бухимдуулж байгаа зүйлсийг дор сийрүүлье.

1.    Гацалт маш өндөр
2.    Дүүрэгт газар сонголт маш ойлгомжтой байна
3.    Баталгаажуулах кодоо оруулж чадахгүй иргэд их байна.
4.    Таньд өмнө нь гэр бүлийн зориулалттай газар өмчлүүлж байсан гэх тайлбар “Өмнө нь өөрийн нэр дээр газар авч байгаагүй иргэдэд”
5.    Нэг байршилд хэд хэдэн хүн хүсэлт гаргасан бол сонголтыг хэрхэн хийх нь ч тодорхойгүй.
6.    Баталгаажуулах код ерөөсөө ирэхгүй буюу устгасан тохиолдолд дахин код ирэхгүй байна.
7.    Е-мэйл хаягаа хийхээр буруу байна гэж гарч ирж байна