Наймхан сарын өмнө нээгдсэн “Залуус 21” архигүй клуб өнөөдөр “Зурагт” зах болсныг та бүхэн харж байна.
Шинэчлэлийн Засгийн тэргүүн оны өмнөхөн Монголын хамгийн анхны архигүй клуб “Залуус 21”-ийн нээлтэд оролцсон юм. Архигүй баар байгуулна гэдэг бидний хэдэн монголчуудыг архин далайгаас аврах том зорилго агуулж байв. Тиймдээ ч Шинэчлэлийн Засгийн газрын дэмжлэг, Эрүүл мэндийг дэмжих сангийн санхүүжилтыг хүртэн үүд хаалгаа нээсэн нь тэр.
2014 оны 8-р сарын 8. "Залуус 21" клуб "Зурагт" нэртэй хүнсний зах болон өөрчлөгдөж нээлтээ хийв.Гэвч архигүй баарны нас хэтэрхий богино байсан бололтой. Тодруулбал наймхан сарын өмнө нээгдсэн “Залуус 21” архигүй клуб өнөөдөр “Зурагт” зах болсныг та бүхэн харж байна. Наймхан сарын өмнө нээгдэхдээ залуусыг архигүй орчинд шоудуулна, архинаас хол байлгах төрөл бүрийн арга хэмжээг зохион байгуулна, хөдөө орон нутгуудад салбаруудаа нээнэ гэж байсан “Залуус 21” ийнхүү чимээгүйхэн хаалгаа барьжээ.
Архигүй баарны халааг авсан “Зурагт” захыг сонжихоор дотогш оров. Тэнд хорь орчим лангуутай жижгэвтэр хүнсний зах бий болгосон байх ба өчигдөр нээлтээ хийсэн гэнэ. Хоёр давхарт юу байгааг үзэхээр дээшээ гарах гэтэл “юу ч байхгүй” хэмээн халгаасангүй. Өмнө нь тус давхарт “Залуус 21” баарны үйл ажиллагааг хариуцаж байсан “Эрүүл идэвхитэй амьдрал клуб”-ынхэн байрладаг байсан юм.
2013 оны 12-р сарын 13. Ерөнхий сайд Н.Алтанхуяг "Залуус 21" клубын нээлтийн үеэр. Үйл ажиллагаа хариуцаж байсан гэснээс “Залуус 21” клубын захиралаар “Эрүүл идэвхитэй амьдрал” клубын тэргүүн Д.Пүрэвсүрэн болон зөвлөх эрхлэгч Ж.Цогтсугар нар ажилладаг байжээ. Тэд цагтаа “Зарим нэг мөнгөтэй хүн танайх ашиг олохгүй шдээ гэдэг. Нээрээ ашиг олдоггүй. Бизнесмэнүүд мэддэг юм байна. Үнэн юм байна. Архи зарж л ашгаа олж авдаг юм билээ. Гэхдээ монголын залуу үе архигүй болох нь ашиг биш үү. Нэг ч гэсэн ээжийн сэтгэл амар тайван байгаа нь ашиг биш гэж үү. Нэг ч гэсэн хүүхдийн, эхнэрийн нүднээс нулимс гарахгүй байгаа нь ашиг биш гэж үү” хэмээн ярьж байв. Үүнийг сонссон хүмүүс тэднийг ямар буянтай үйл хийж буйг шагшин магтаж байсан биз. Гэтэл тэд улсын мөнгө оролцсон архигүй клубээ ашиггүй болоод ирэхийн цагт зах болгочихсон байх юм.
Ерөнхий сайд тухайн үед "Архи, согтууруулах ундаагүйгээр хүмүүс нөхөрлөж, ярилцаж, бүжиглэж, амралт чөлөөт цагаа хөгжилтэй өнгөрөөж болохыг залуустаа хэлж уриалахын зэрэгцээ тийм орчинг нь бүрдүүлж өглөө" гэж байв.Нөгөө талаас 21-р зуунд архигүй клуб байгуулна гэдэг анхнаасаа бүтэхгүй санаа байсан. Дэлхийн хаана ч ийм цэнгээний газар байдаггүй. Байлаа гэж бодоход ашиг орлогын тухай бодоод ч хэрэггүй биз. Өөрөөр хэлбэл буяны байгууллага санхүүжүүлдэггүй юм бол “Залуус 21” тогтмол үйл ажиллагаа явуулна гэдэг “үлгэр” байсан. Гэтэл Засгийн газар юунд итгэж дэмжсэн нь хачирхалтай. Тиймээс ч зарим хүмүүс “Залуус 21”-ийг анхнаасаа ийм төлөвлөгөөтэйгээр байгуулсан байх хэмээн хардаж эхэллээ. Тиймээс ч тус клуб ямар учраас хаалгаа барьсан, чухам яагаад зах болгосон, хэн тэрхүү захыг ажиллуулж байгаа зэрэгт холбогдох хүмүүс тайлбар хийх хэрэгтэй юм.
24tsag.mn
Сэтгэгдэл (30)