Нийслэл хотын замын түгжрэлийг бууруулах нэрийдлээр олон ч ажил хийж байна. Харин тэр бүхэн нь дорвитой үр дүнд хүрч өгөхгүй байгаа нь нууц биш. Түгжрэл бууруулах нэрийдлээр нэгдүгээр эгнээнд байрлуулсан автомашинуудыг ачиж журамладаг болоод багагүй хугацаа өнгөрсөн. Улмаар машины улсын дугаарыг тэгш, сондгойгоор нь ангилан замын хөдөлгөөнд оролцуулж байгаа. Цаашлаад “Риал бус” гаргаж ирж замын түгжрэлийг бууруулах гэсэн ч бүрч дордуулаад авсан. Энэ мэт замын түгжрэлийг бууруулах олон ч зүйл санаачлан хийж байгаа ч тэр бүгд нь иргэдийг халаасыг уудалсан, уур бухимдлыг нь хүргэсэн зүйлүүд болж хувирсаар.

Одоо бүр  түгжрэл ихтэй тодорхой бүсүүдэд автомашиныг төлбөртэйгээр зорчуулах талаар яригдаж эхэллээ. Үүнийг сонссон зарим иргэд төрийн томоохон албан тушаал хашдаг, үнэтэй машин унадаг томчуудаасаа авна биз гэцгээж, харин нөгөө хэсэг нь замын асуудлаа шийдэж, гадны орон шиг болгохоо бодохгүй иргэдэд хүндрэл тарьж, мөнгө идэх аргаа боловсруулж суух юм хэмээцгээж байна.

Харин энэ асуудлаар Нийслэлийн Засаг даргын Зам тээвэр, дэд бүтцийн асуудал хариуцсан орлогч Н.Гантөмөр байр сууриа илэрхийлэхдээ “Энэ бол зайлшгүй шаардлагатай байгаа асуудал. Өнгөрсөн жилийн эцсээр 49800 автомашин шинээр хөдөлгөөнд оролцсон. Манай ерөнхий  төлөвлөгөөгөөр 2020 он гэхэд 450 орчим мянган автомашин нийслэлийн замын хөдөлгөөнд оролцоно гэж тооцсон байгаа. Гэтэл одоо буюу 2014 онд энэ тоо бараг илүү гарах шинжтэй байна. Эхний ээлжинд мэргэжлийн байгууллагуудын өгсөн чиг хандлагаар бол Баруун дөрвөн зам-Бөхийн өргөө, Чингис зочид буудал-Гэсэр сүм гэсэн хэсгүүд дээр хийнэ гэсэн төлөвлөгөөтэй байгаа. Тухайн бүсэд суурьшиж байгаа иргэд СӨХ дээрээ бүртгэлтэй байдаг. Тэр бүртгэл  бүсийн хязгаарлалтад хамаарахгүй. Мөн тухайн бүсэд бүртгэлтэй албан байгууллага, харьяаллын цэцэрлэг, сургууль руу зорчиж байгаа тохиолдолд бүртгэлийнх нь дагуу төлбөрөөс чөлөөлнө. Харин гаднаас хүмүүс тухайн бүс рүү орж ирвэл төлбөрийн хувьд ярьж эхэлнэ. Энэ бол тийм амар ажил биш ч нийслэл хотод маш хэрэгтэй юм гэдгийг иргэд ойлгох хэрэгтэй. Эхний ээлжид тогтмол бус орж гардаг тээврийн хэрэгслийн сарын хураамж нь 40-50 мянган төгрөг байхаар  төлөвлөж байгаа.  Харин  өдрийн хураамжийн тухайд 1000-1500 төгрөг байхаар ярьж байна. Үүнийг НИТХ-д танилцуулаад хэлэлцэнэ. Хотын амьдралыг улс төрөөс хол байлгах нь зүйтэй гэж үзэж байгаа. Уг асуудлыг энэ сарын 13-нд болох НИТХ-аар эцэслэх юм” гэсэн юм.

Ер нь аливаа асуудал эрсдэлийг дагуулдаг бичигдээгүй хуультай. Магадгүй энэ бүхэн түүний хэлж буйгаар зохицуулагдвал замын түгжрэл буурах хандлагатай ч байж мэдэх юм. Эсвэл эсрэгээрээ иргэдийн хэлсэнчлэн зүгээр нэг мөнгө идэх арга зам ч болоод хувирчиж мэдэх юм. Юутай ч бидний зүгээс хэвлэл мэдээллийн хэрэгслээр иргэдийн хийгээд, албаныхны байр суурийг тэнцвэртэй хүргэхийг зорилоо.

Гагцхүү эдийн засаг хүндрэлтэй байгаа энэ үед ард иргэдийн нуруун дээрх ачааг улам хүндрүүлэхгүй байх үүднээс албаныхан маань ажлаа хийгээсэй.

Хэрэв энэ ажил хэрэгжиж эхэлвэл иргэн тус бүр өдөрт 1000-1500 төгрөг, сард 40-50 мянга, жилд 600 мянган төгрөг төлөх юм.

Тэгвэл 2014 онд 49800 машин замын хөдөлгөөнд шинээр оролцоно гэхээр иргэдийн халааснаас багагүй мөнгө зарцуулагдах нь тодорхой байгаа юм.