"Дугуй түгжих" үйл ажиллагааг энэ сараас хэрэгжүүлж эхлэх гэж байгаатай холбогдуулан Нийслэлийн замын цагдаагийн газрын холбогдох албаны хүнээс энэ талаар тодруулахад "2014 оны зургаан сарын 26-ны өдрийн НИТХ-ын 98 дугаар тогтоолоор тээврийн хэрэгслийн дугуй түгжих үйл ажиллагааг 8-р сарын 18-ны өдрөөс хэрэгжүүлэхээр болсон.
Тээврийн хэрэгслийн түр зогсохыг хориглосон буюу тээврийн хэрэгслийн зогсох ёсгүй газар зогссон, бусдын хөдөлгөөнд саад учруулахаар автомашинаа тавьсан жолоочийн автомашиныг ачих үйлчилгээг Замын хөдөлгөөний удирдлагын төвөөс явуулж байсан.  Энэ хугацаанд иргэдээс төлбөр өндөр, журмын хашаа хол байна гэх саналууд ирсэн.
Тиймээс иймэрхүү саналуудыг шийдэхээр дугуй түгжих ажиллагааг хэрэгжүүлж эхлэхээр болсон байгаа. Хэрэв дугуйгаа түгжүүлвэл тухайн жолооч 20 мянган төгрөгний хураамж төлөөд түгжигчийг тайлуулах боломжтой болж байгаа. Урд өмнө нь тээврийн хэрэгслээ ачуулчихаад хаана байгааг нь мэдэх гэж цаг хугацаа, эдийн засгаа алддаг байсан бол одоо тээврийн хэрэгслийнх нь дугуйг нь түгжээд цонхон дээр нь холбогдох утасны дугааруудыг тавьж байхаар тогтож байгаа" гэв.