Мэргэжлийн хяналтын ерөнхий газрын дарга Д.Батмөнх, дэд дарга Б.Эрдэнэбилэгт тэргүүтэй төлөөлөгчид наймдугаар сарын 05-07-ны өдрүүдэд БНХАУ-ын ӨМӨЗО-ны Хөх хот, Эрээн болон Хилээр орох, гарахыг хянах, хижиг байцаах товчоонд ажлын айлчлал хийв.Айлчлалын үеэр Эрээн хотын дарга Цау Жи болон товчооны дарга Жөв Ион Шин нартай уулзаж харилцаа, хамтын ажиллагаагааг өргөжүүлэн хөгжүүлэх талаар санал солилцлоо.
Мэргэжлийн хяналтын ерөнхий газар, БНХАУ-ын Чанарын хяналт, шалгалт, хорио цээрийн ерөнхий газар хоорондын хамтын ажиллагаа идэвхжиж, яриа хэлэлцээ тогтмолжин үр дүнд хүрч байгаад талууд санал нэгтэй байгаагаа тэмдэглэв.
Эрээн хотын зүгээс хүн, мал, амьтны гаралтай халдварт, гоц халдварт өвчин, ургамлын хорио цээрт тавих хяналт, шалгалт хийх, урьдчилан сэргийлэх ариутгал, халдваргүйжүүлэлтийн орчин үеийн автомат төхөөрөмжийг ойрын хугацаанд Замын-Үүд боомтод олгохоор болж, харин угсралтын асуудлыг Монголын тал хариуцахаар тохиролцов.
ӨМӨЗО-ны хорио цээрийн байгууллага манай долоон боомтын ариутгал, халдваргүйжүүлэлт болон Бичигт-Зүүнхатавч, Ханги-Мандал, Баянхошуу-Өвдөг боомтод лаборатори байгуулах, Замын-Үүд боомтын лабораторийн хүчин чадлыг бэхжүүлэх, 12 боомтод зорчигчийн халуун хэмжигч төхөөрөмж суурилуулах асуудлыг холбогдох байгууллагуудад тавьж шийдвэрлүүлнэ гэдгээ мэдэгдэв.
Түүнчлэн БНХАУ-ын хорио цээрийн байгууллагын ажлын ололт амжилт, туршлагыг судлах зорилгоор жилд 25-аас доошгүй улсын байцаагч, мэргэжилтнийг сургалт, семинарт хамруулах тухай ярилцаж хамтран шийдвэрлэхээр боллоо.
Мэргэжлийн хяналтын ерөнхий газрын дарга Д.Батмөнх тэргүүтэй төлөөлөгчид Замын-Үүд боомтод ажиллахдаа сумын Засаг дарга, гааль, Иргэний харьяалал, шилжилт хөдөлгөөний газар, боомтын захиргааны удирдлагуудтай уулзан ажил байдалтай нь танилцаж, байгууллага хоорондын хамтын ажиллагааг сайжруулах, худалдааг хөнгөвчлөх, иргэдэд чирэгдэлгүй, хөнгөн шуурхай үйлчлэх, ажлаа зөв уялдуулж явуулах шаардлагатай байгааг зөвлөлөө.
Энэ үеэр Хилийн мэргэжлийн хяналтын байгууллага гамшгийн үед ажиллахад бэлэн байгаа эсэхийг газар дээр нь бэлэн байдлын үзлэг хийн шалгав. Шинэчлэлийн Засгийн газрын бодлогын дагуу Хилийн мэргэжлийн хяналтын салбарт хийгдэж байгаа шинэчлэлт, авч хэрэгжүүлж буй арга хэмжээ, худалдааг хөнгөвчлөх чиглэлээр хилийн хяналтын бусад байгууллагатай хамтран ажиллаж байгаа талаар нийт улсын байцаагчдад танилцуулж, мэдээлэл өгсний дээр тэдний санал хүсэлтийг нь сонсож, сонирхсон асуултад нь хариулав.
Замын-Үүд боомтын захиргааны зүгээс хяналтын урсгалд нийцүүлж Хилийн мэргэжлийн хяналтын албаны ажилтнуудтай ажлын байрны зохицуулалт хийх шаардлагатай байгааг Хилийн боомтын зөвлөлийн гишүүн, МХЕГ-ын дарга Д.Батмөнх тус боомтын захиргааны удирдлагуудад үүрэг, чиглэл болгов.
