Улаанбаатар хотын иргэдэд шинээр 52 байршилд гэр бүлийн хэрэгцээний зориулалтаар газар өмчлүүлэх ажлын эхлэлийг тавьж, өнөөдөр эхний таван байршилд газар өмчлөх иргэд тодорлоо.

Энэ ажлын бүртгэл, сонгон шалгаруулалт бүхэлдээ цахим орчинд явагдсан бөгөөд нийт 14 954 иргэн автоматаар сонгогджээ. Гэвч иргэд газартай болсон эсэхээ хараахан мэдэж чадаагүй байна. Тодруулбал бүртгүүлсэн иргэдийн гар утсанд газар өмчлөх эрхтэй болсон эсвэл болоогүйг мэдээлсэн зурвасууд ирэхгүй байгаа юм. Үүнийг албаныхан үүрэн телефоны компаниудын ачаалалтай холбон тайлбарлаж байгаа бөгөөд бүртгүүлсэн иргэдэд энэ тухай мэдээлэл тун удахгүй очино гэв.

Хэрэв та газар өмчлөх эрхтэй боллоо гэсэн зурвас хүлээн авбал дараах байршлуудад очиж өргөдөлөө өгөөрэй.

-СХД-ийн Соёондын аманд сонгогдсон иргэд ажлын өдрүүдэд тус дүүргийн 62-р сургууль,

-Хан-Уул дүүргийн 12, 13 дугаар хороонд байрлах Эрдэнэтолгойд сонгогдсон иргэд 75-р сургууль,

-Баянзүрх дүүргийн 20 дугаар хороо Хожуулын аманд сонгогдсон иргэд ЗДТГ-ын иргэний танхимд,

-Багануур дүүргийн 4 дүгээр хороо Тариан булагийн 1-р хэсэгт сонгогдсон иргэд Гүнгалуутай цогцолбор сургууль,

-Баганхангай дүүргийн 2 дугаар хороо Бор-Үзүүрт сонгогдсон иргэд Хангай цогцолборт очиж өргөдлөө өгнө.

Харин Улаанбаатар хотын төвд амьдардаг боловч Багануур дүүргийн байршилд сонгогдсон иргэд ХУД-ийн 75-р сургууль, Багахангай дүүргийн байршилд сонгогдсон иргэд БЗД-ийн иргэний танхимд тус өргөдлөө өгөх боломжтой юм байна.

Дээрх 5-н байршилд сонгогдож амжаагүй үлдсэн иргэд дараа дараагийн шатны зарлагдах байршлуудад сонголт хийх боломж нь нээлттэй юм.