Нийслэлийн Засаг даргын санаачлагаар Зүүн хойд Азийн Хотын дарга нарын “Хотын тогтвортой ба хүртээмжтэй хөгжил” форум энэ сарын 18, 19-ний өдрүүдэд Улаанбаатар хотноо болно. Тус форумд Зүүн хойд Азийн зургаан улсын 120 гаруй төлөөлөгч оролцох юм. Өнөөдөр нийслэлийн Засаг дарга бөгөөд Улаанбаатар хотын Захирагч Э.Бат-Үүл  БНАСАУ-ын Пхеньян хотын ардын хорооны дарга ноён Ча Хий Рим тэргүүтэй төлөөлөгчдийг хүлээн авч уулзлаа.

Улаанбаатар хот нь Пхеньян хоттой 2003 оны 11 сард эгч дүү хотын харилцаа тогтоожээ. Уулзалтын үеэр нийслэлийн Засаг дарга “Хэдийгээр бид 2003 онд эгч дүү хотын харилцаа тогтоосон ч сүүлийн жилүүдэд хамтын ажиллагаа харьцангуй удааширсан байсан. Тиймээс энэхүү форум нь манай хоёр хотын  цаашдын хамтын ажиллагаагааг илүү тодорхой болгоход дэмжлэг болно гэж итгэж байна. Пхеньян хотоос суралцах зүйл бидэнд их байгаа. Ялангуяа эдийн засаг, хот тохижилт, цэцэрлэгжүүлэлт, хөдөө аж ахуйн салбарт хамтран ажиллах хүсэлтэй байгаа” гэдгийг онцлон хэлж, Зүүн хойд азийн хотын дарга нарын форумд оролцохоор хүрэлцэн ирсэнд талархал илэрхийлсэн.

Мөн Улаанбаатар хот 2030 он хүртэлх урт хугацааны хөгжлийн бодлогоо тодорхойлсон томоохон хөтөлбөрийг УИХ-аар батлуулсан. Энэхүү хөтөлбөрийг хэрэгжүүлэхдээ бүс нутгийн хотуудтай хамтран ажиллахаар төлөвлөж байгаа гэдгийг ч дурьдсан. Харин Пхеньян хотын ардын хорооны дарга ноён Ча Хий Рим “Манай хоёр хотын цаашдын харилцаа ч өргөжиж, эдийн засаг, хөдөө аж ахуй, соёлын салбарт голчлон хамтран ажиллах хүсэлтэй” байгаагаа илэрхилжээ.