2014 оны 8-р сарын 20-ны өдөр үдээс өмнө Сэлэнгэ аймгийн төв Сүхбаатар хотын төв талбай дээр Сүхбаатар жанжны хөшөөнд цэцэг өргөн, Оросын Эрхүү хотоос буухиачлан авчирсан “Мөнхийн гал”-ыг аймгийн удирдлагуудад хүндэтгэлтэйгээр гардуулж, ахмад дайчидаа алдаршуулах, хүндэтгэл үзүүлэх ёслолын ажиллагаа болж өнгөрлөө. Үдээс хойш “Ялалтын дөл” аяллын цуваа Дархан хотыг зорьсоноор Сэлэнгэ аймгийнхан зочдоо үдэн гаргалаа. Дархан-Уул аймгийн зааг болох Орхон сумаас эхлэх Дархан хотынхны угтан авалт эхэлсэн. Аймгийн удирдлагын төлөөлөл болон цэргийн ангийн удирдлагууд оросын төлөөлөгчдийг тавгийн идээ, дуу хуур, талархалын үгээр угтан, Дархан хот руу хөдөлсөн юм.

Нийт Дарханчууд болон цэргийн ангийн бие бүрэлдэхүүн, соёл урлагийн уран бүтээлчид “Дархан 50 цогцолбор”-ын талбай дээр хүндэтгэл үзүүллээ. Ирсэн ахмад дайчдын дунд 1939 оны Халх голын байлдааны амьд гэрч Шагдар гуай хүрэлцэн ирсэн байлаа. Оросын төлөөлөгчид уламжлал ёсоор түүнд ивээн тэтгэгч байгууллагуудын шагналыг гардууллаа. Хүндэтгэлийн үйл ажиллагаа уран бүтээлчдийн тоглолт, БХЯ-ны шагнал, урамшуулал болон Дархан хотын удирдлагын мэндчилгээгээр үргэлжилж  ОХУ-аас суугаа эрхэм консул нийт оролцогчдод цаашдын аялалд нь амжилт хүслээ.

Тэртээ 75 жилийн өмнө монгол зөвлөлтийн дайчид Монгол Улсын тусгаар тогтнолын төлөө мөр зэрэгцэн тэмцэж явсан эрэлхэг түүх өнөөдрийн хоёр орны залуучуудыг холбох гүүр болж, цаашид ойртон нөхөрлөх, хамтран ажиллах сайхан боломжийг олгож байна. Аялал цаашаа Эрдэнэт хот руу хөдөлж, улмаар Оросын оролцогчдыг өөрийн авьяас чадвараараа шалгарсан монголын 75 залуу Улаанбаатар хотод угтан авах болно.