Автобусны үнэ өдрийн турш 500 төгрөг болж, маршрутын богино зохион байгуулалтад орсон бөгөөд энэ сарын 31-ныг хүртэл энэ журам үйлчлэхээр болсон нь иргэдийг бухимдуулсан ажил болоод байна. Харин Хэрэглэгчийн төлөө байгууллагууд нэгдэн 700-аад хүн хамруулсан, долоон төрлийн асуулт асуусан судалгааны дүнгээ олон нийтэд өнөөдөр танилцуулж, хотын даргад шаардах бичгийг хүргүүллээ.
Судалгаагаар хэрэглэгчийн дийлэнх нь буюу 90 гаруй хувь нь өдрийн турш 500 төгрөгөөр явж байгаа нь таалагдаж байгаа ч, чиглэл маршрутын асуудал маш хүнд, олон дамжиж хүрэх газраа хүрч байна хэмээн бухимдаж буйгаа илэрхийлсэн байна.
Юутай ч иргэдээс авсан судалгаа хийгээд Э.Бат-үүл даргад хүргэсэн шаардлагын талаар Монголын хэрэглэгчийн эрх, Боловсролын холбооны тэргүүн Б.Цэрэнгээс зарим зүйлийг тодрууллаа.
-Туршилтаар явж байгаа нийтийн тээврийн шинэ үйлчилгээний талаар иргэдээс санал асуулга авсан гэсэн. Судалгааны үр дүнгийн талаар мэдээлэл өгөхгүй юу?
-Хэрэглэгчийн эрх боловсролын холбоо, Монголын хэрэглэгчийн эрхийг хамгаалах нийгэмлэгүүдийн нэгдсэн холбоо хамтраад Нийслэлийн засаг даргаас гаргасан нийтийн тээврийн туршилтын маршрутын үйл ажиллагаа, үнэ тариф дээр тодорхой тандалт судалгааг хийлээ.
Өчигдөр буюу наймдугаар сарын 26-ны өдөр бид хэрэглэгчдээс ирсэн гомдол саналын дагуу судалгааг хийсэн. Судалгаанд таван дүүргийн 700 гаруй иргэдийг хамруулсан.
Бидний зүгээс үнэ тариф хэр таалагдаж байна, автобусны мэдээлэл маршрут, буудал хоорондын зай, зам талбай гарах асуудлууд дээр төвлөрч судалгаагаа авсан. Мөн иргэд энэ үйлчилгээ хэр таалагдаж байна гэдэг дээр санал асуулгаа чиглүүлсэн.
Харин үр дүнгийн хувьд, иргэд 500 төгрөгөөр явж байгаа асуудлыг сайшааж байна. Тэр дундаа гадуур, дотуур ажил хөөцөлддөг иргэдэд өдрийн турш 500 төгрөгөөр зорчиж байгаа нь таалагдаж байгаа гэдэг нь тодорхой болсон. Тэгвэл тэтгэврийн болон хөнгөлөлттэй явдаг хүмүүст энэ ажил нэг их нөлөөлөлгүй байгаа нь судалгаагаар гарсан.
Ер нь зорих газраа хүрэхийн тулд хэд дамжиж байгааг тодруулахад, хамгийн багадаа 3-4 дамждаг гэдгээ хэлж байна. Автобус хоорондын буудлын зай хол буюу доод тал нь 200-1км хүртэл алхаж байна гэсэн. Түүнчлэн, автобусны маршрутын мэдээлэл маш муу байгаа учир хаана зогсож, ямар автобусанд суухаа хүмүүс мэдэхгүй байна. Энэ мэт зүйлээс болж хүмүүс бухимдалтай байна. Ялангуай хөгшин хүмүүс зам гарцыг олон дахин гарч, автобус дамжиж явах төвөгтэй байна гэсэн судалгаа гарлаа.
Энэ мэт гомдол саналтай 700 гаруй иргэний гарын үсэгтэй саналууд бидэнд байна. Ийм хариу гарсан учраас бид нэн даруй Нийслэлийн засаг дарга бөгөөд Улаанбаатар хотын захирагч Э.Бат-Үүлд шаардлага хүргүүлсэн.
-Э.Бат-Үүл даргатай уулзаж, шаардах бичгээ өгөхөд хэрхэн хүлээж авч байна?
-Шаардах бичгийг хүлээж авсаны дараа Э.Бат-Үүл дарга “Танай шаардлагын чинь хаяг буруу байна. Надад биш НИТХ-д өгөх ёстой гэсэн. Мөн би эрх хэмжээнийхээ хүрээнд шийдвэр гаргасан. Надад сахилгын хариуцлага тооцох гэж байгаа бол надад биш НИТХ-д шаардлагаа хүргүүл. Ер нь хэрэглэгчийн гэх байгууллага байдаг ч юм уу, үгүй ч юм уу” гэсэн хариулт өгсөн. Миний зүгээс манай хотыг удирдаж байгаа шилдэг боловсон хүчин болох Э.Бат-Үүл даргад гомдолтой байна. Учир нь туршилтын 10 хоногийн шийдвэрийг гаргахдаа зөвхөн Э.Бат-Үүл даргын захирамжаас шалтгаалсан. Тэгэхээр Э.Бат-Үүл даргаа захирамжаа өөрчилж, цуцалж болно шүү дээ.
-Шаардах бичигт юу, юу тусгасан бэ?
-Эхний ээлжинд 500 төгрөгөөр өдрийн турш зорчдог байдлыг үргэлжлүүлж өгөхийг хүссэн. Өөрөөр хэлбэл, энэ ажлыг туршилтын хугацаагаар хэмжээд дуусгачихгүй, ирэх сарын ажлын ачаалалтай үеүүдэд ч үргэлжүүлж өгөөч гэсэн.
Хоёрдугаарт, иргэд уг туршилтыг эхэлсэнээс хойш мах их бухимдалтай байна. Тиймээс сургууль, цэцэрлэг эхлэх гэж байгаа энэ үеэр иргэдийг бухимдлыг багасгах зорилгоор хуучин маршрутад оруулж өгөхийг хүссэн. Учир нь зөвхөн Э.Бат-Үүл даргын захирамжаар шийдвэр гарсан учир, Э.Бат-Үүл дарга захирамжаа өөрчилж, хүчингүй болгох боломжтой юм.
Гуравдугаарт, ер нь ихэнх нийтийн тээврээр үйлчлүүлсэн иргэд их бухимдсан байна. Тиймээс нийтийн тээврийн хэрэглэгчдийг уурлуулсаныхаа төлөө “уучлал хүсээч” гэсэн. Мэдээж уучлалын цаана хариуцлага байх ёстой. Эд мөнгөний материаллаг хариуцлага байх ёстой. Тиймээс Э.Бат-Үүл даргыг нэг жилийнхээ орлогоос тодорхой хэмжээний хөрөнгийг нийтийн тээврээр үйлчлүүлж байгаа хөгжлийн бэрхшээлтэй иргэдэд зориулж хандив өгөөч гэж хүссэн.
Мөн боломжтой бол 1.3 тэрбум төгрөгөөр нийтийн тээвэрт тулгамдаад байгаа асуудалд, хүүхдийн сургууль, цэцэрлэгт анхаарлаа хандуулах хэрэгтэй байгааг тусгасан.
Д.Ундрах /24tsag.mn/
Сэтгэгдэл (44)