Компанийн үйл ажиллагааг хөдөлгөгч гол хүч нь ажилчин, ажиллагсад билээ. Аж ахуйн нэгжийн бодлогын салшгүй нэг хэсэг нь ажилчдынхаа хүүхдүүдийн нийгмийн хөгжил, боловсролд тодорхой хувь нэмэр оруулахад чиглэгддэг. Харин энэ асуудлыг хөндөж, аж ахуй нэгжүүдийн дунд тодорхой санаачилга, ажил хэрэг өрнүүлэхээр Нийслэлийн боловсролын газар, МҮХАҮТ хооронд хамтран ажиллах санамж бичиг үзэглэж байсан юм.
Тэгвэл өнөөдөр уг санамж бичиг ажил хэрэг болж хичээлийн шинэ жилийн нээлт буюу есдүгээр сарын нэгэнд МҮХАҮТ-ын ууган гишүүн “Хатан сүлжээ” компани 113 хүүхэд хүлээн авах хүчин чадалтай “Хатан манцуй” хүүхдийн цэцэрлэг байгуулж ашиглалтанд орууллаа. Уг цэцэрлэг дөрвөн ангитай бөгөөд саруулхан шинэ өрөө танхимтай, бүх зүйл стандартын дагуу хийгдсэн, мэргэжлийн багш сурган хүмүүжүүлэгчтэй, хүүхдийн хүсэл сонирхолд тулгуурлан сургуулийн өмнөх боловсрол олгохоор хүүхдээ хүлээж авахад бэлэн болжээ.
“Хатан манцуй” цэцэрлэг Баянгол дүүргийн 16 дугаар хороонд байрлаж байгаа бөгөөд тус хорооны анхны цэцэрлэг юм байна. Уг цэцэрлэгийн үүсгэн байгуулагч “Хатан сүлжээ” компанийн ерөнхий захирал Б.Бадамханд, манай компанид 60 гаруй эмэгтэй ажилчид ажилладаг, үр хүүхэддээ үргэлж санаа нь зовж байдаг. Зарим нь хүүхдээ алимны хайрцганд унтуулаад ажлаа хийж байсан үе ч бий. Тиймээс өөрийн ажилтнуудаа сэтгэл амар ажлаа хийх нөхцлийг бүрдүүлэх, хүүхэддээ санаа зовохгүй, ажлын бүтээмж өндөр байхыг бодолцож энэ цэцэрлэгийг байгуулсан. Улсын цэцэрлэгт хүүхдээ оруулж чадсангүй гэсэн олон эцэг эхчүүдэд манай цэцэрлэг багтаамжийнхаа хүрээнд тус болно гэж бодож байна. Сайхан орчинд, сайн багш нараар хичээл заалгахаар болсонд баяртай байна гэв.
УИХ-ын гишүүн, МҮХАҮТ-ын дарга С.Дэмбэрэл, манай компаниуд дэргэдээ цэцэрлэг байгуулах эхлэл тавигдаж байна. Компаниуд нийгмийн хариуцлагынхаа хүрээнд энэ ажлыг хийж байгаа. Түүнээс биш цэцэрлэгээс ашиг олоод байгаа даа биш юм. Сургуулийн өмнөх насны боловсрол олгодог цэцэрлэгүүдийн хүрэлцээг нэмэгдүүлэхэд хувийн хэвшилд л түшиглэсэн нь дээр. Харин төр нь энэ талынх нь хөрөнгө оруулалтыг дэмжиж, хөрөнгө оруулсан компаниудыг төрөл бүрээр дэмжих хэрэгтэй. Тухайлбал, татварын хөнгөлөлт үзүүлэх, цэцэрлэг байгуулсан байрыг нь үл хөдлөх хөрөнгийн татвараас чөлөөлөх гэх мэтээр хөшүүрэг бий болгож болно. Энэ талаас нь МҮХАҮТ, би өөрөө УИХ-ын гишүүний хувьд идэвхтэй ажиллана гэв.
