12 жилийн өмнө амийг нь аварсан эмч нартаа баярласнаа илэрхийлж, халуун сэтгэлийн урам хайрласан монгол залуугийн тухай мэдээллийг АНУ-ын Миннессато мужийн Рочестер хотын Mayo Clinic-т ажиладаг танил маань бидэнд ирүүллээ. Чин сэтгэлийн үйл хэрэг эмнэлгийн ажилчдад асар их урам хайрласан бөгөөд энэ тухай мэдээллийг ABC телевиз ч сурвалжлага бэлтгэн хүргэсэн байна. Монгол хүн ачийг ачаар хариулж америкчуудын сэтгэлийг хөдөлгөсөн гэгээн түүхийг хүргэе.

    2002 онд 14 настай Б.Баясаа амь өрссөн зүрхний хагалгаанд орохоор Монголоос Mayo Clinic эмнэлэгт очжээ. Зүрхэндээ цоорхойтой төрсөн бяцхан хүүгийн хувьд энэ явдал ид шидийн юм шиг байсан нь ойлгомжтой. Тэрээр монголд найман настайдаа мэс засалд орохоос өмнө амрахгүйгээр олон үйлдэл хйиж чаддаггүй байсан бөгөөд хагалгааны дараа ч гэсэн түүний зүрх хаагдах эрсдэл маш өндөр байв. Баясаа үеийнхээ хүүхдүүд шиг нийгмийн харилцаанд орох ямар ч боломжгүй байсан аж. 

2014 онд Б.Баясаа Рочестерт эргэж иржээ. Тэрээр урьд жил нь урт хугацааны эмчилгээний үеэр түүнийг гэртээ хүлээн авч байлгасан Mayo Clinic-ийн эгч дүү албан хаагчид болох Ким Шмидт, Блүүд Банк болон Кати Каэхлер нартай холбогдож чадсанаар тэдэнд талархсанаа илэрхийлэх гэж Рочестерт зочилсон байна. Тэрээр зөвхөн амийг нь аварсан алтан гартнуудад талархах гэж ирсэнгүй өөрийг нь болон хамт эмчилгээнд явсан хоёр монгол хүүгийн эмчилгээний бүхий л зардлыг хандивласан Рочестерийн Бетел Лутеран сүм болон Хүүхдийн зүрхний төслийн хамт олонд талархахыг хүссэн байна.

Одоо 26 настай Баясаа эрүүл энх амьдарч ажиллаж байгаа бөгөөд сүйт бүсгүй Ч.Энхүлэйн хамт Mayo Clinic-т зочилсон юм. Анхны аялалаасаа хойш англи хэл судалсан Баясаа тус эмнэлгийн хамт олон түүний амьдралд ямар чухал ач холбогдолтой байсныг ойлгуулахыг хүссэн гэлээ. Тэрээр “Сүмийн хүмүүс болон Mayo Clinic-ийн хамт олон надад болон бусад өвчтөнгүүдэд үнэхээр сайн хандаж байсан. Хэрвээ тэд намайг эмчлүүлэх үеэр зочид буудалд байлгасан бол тухгүй байх байсан биз. Харин албан хаагчид нь миний зочин гэр бүл болж намайг гэртээ байлгасанд үнэхээр их талархаж байна. Би ирээдүйд тэдний нэг болохыг хүсч байна” гэжээ.

Зочин гэр бүлийн эгч дүүс болох Шмидт болон Каехлер нарт энэ маш том шагнал мэт санагдсан бөгөөд өөрийн эмнэлгээ огт өөр нүдээр харахад хүргэсэн байна. “Бидний хийсэн зүйлд ийм талархал хүлээн авахад үнэхээр сайхан байна. Би Mayo Clinic-ийн ажилтан болсондоо ч баяртай байна” хэмээн ярьжээ.

Баясаа өөрт нь мэс засал хйисэн эмч Жозеф Деаранитай уулзсан бөгөөд “Би чин сэтгэлээсээ баярлалаа гэж хэлмээр байна. Та энэ дэлхийн хамгийн сайхан ажлыг хийдэг хүн юм. Хүүхдүүдэд амьдрал бэлэглээд л. Та бол дэлхийд бэлэг болж ирсэн хүн” хэмээн хэлжээ.
Тэрээр эмнэлэг болон сүмд хандивын арга хэмжээ зохион байгуулж байгаа юм. Чин сэтгэлийн үйл хэрэг үргэлж баяр баясал авчирдагийн жишээг монгол залуу харуулж явна.