Өнгөрсөн зургадугаар сарын 6-наас эхлэн  Толгойт өртөөнөөс Амгалан чиглэлд “Railbus” үйлчилгээнд явж эхэлсэн. Тухайн үед сүр дуулиантайгаар нээлтээ хийж, зөв шийдэл, хөгжил дэвшил мэтээр эрх баригчид тайлбарлаж байсан. Өөрөөр хэлбэл, “Railbus” үйлчилгээнд гарсанаар иргэдэд түргэн шуурхай хүрч үйлчилж, олон нийтийн санааг хамгийн ихээр түгшээж, нийгэмд стрессийг үүсгэдэг замын түгжрэлийг бууруулна гэдгийг ч албаныхан дуу нэгтэйгээр хэлээд байсан.  Гэвч эрх баригчдын магтаж сайшаагаад байсан “Риалбус” үйлчилгээнд гараад гурван сар гаруй хугацаа өнгөрсөн ч өнөөдрийг хүртэл үйлчлүүлэгчээ татаж чадаагүй, алдагдалтай ажилласаар байгаа юм. Тодруулбал нэг удаадаа 340 хүнд үйлчлэх боломжтой “Railbus”-аар өдөрт  30-40 хүн ч үйлчлүүлэхгүй байгаагаас ийн алдагдалд ороод байгааг эх сурвалжууд онцолж байна. 

 Иймээс энэхүү төмөрзамын автобус цаашид энэ хэвээрээ ажиллавал алдагдал нь улам нэмэгдэх ойлгомжтой. Тиймээс алдагдал нэмэгдэж эхлэхээс өмнө “Риалбус”-ыг татан буулгаж, үйлчилгээнд гаргахгүй байхаар болж байгаа аж.

  Өөрөөр хэлбэл, эдийн засгийн байдал  хүндэрч эхэлсэн энэ үед 3,9 сая доллараар худалдан авсан энэхүү төмөр замын автобус нь автозамын түгжрэлийг сааруулж ажлын бүтээмжийг нэмэгдүүлнэ  хэмээж байсан ч ийн  талаар өнгөрч байх шиг байна. Мөн иргэдэд нийцсэн, нийгэмд хэрэгтэй зүйл болно гэж байсан ч эсрэгээрээ түгжрэл, осол аваар, иргэдийн бухимдлыг улам ихээр нэмэгдүүлсэн зүйл болж хувирлаа.

 Эцэст нь сая саяаар алдагдалд орсон учир “Риалбус”-ыг энэ оноос өмнө татан буулгахаар болоод байгаа гэдгийг зарим эх сурвалжууд онцлов.

 Цаашлаад иргэдийг 3000 төгрөгөөр зорчуулж байж ашигтай ажиллана хэмээн тооцоолсон албаныхан жирийн иргэдийнхээ амьдралын төвшинг хараахан  судлаагүй бололтой. Мөн Толгойтоос амгалан өртөөний хооронд явж байгаа нь иргэдийг “Риалбус”-ыг сонгоход хүргэхгүй байгаа бөгөөд адаглаад Налайх, Хонхор ордог болчихвол “Риалбус”-ыг сонгон үйлчлүүлэх иргэдийг тоо ч ихсэх байх гэж хөндлөнгийн эх сурвалжууд үг дайлаа.

 Зам тээврийн яамны сайд А.Гансүхийн хэлж буйгаар “Зогсоолууд байгаа ч зогсоолруугаа очсон дэд бүтэц алга. Тухайлбал, автобусны буудал, таксины зогсоол, явган хүний зам байх ёстой. Энэ дэд бүтцээ яаралтай хийж өгөх хэрэгтэй. Тэгэх юм бол “Риалбус”-ыг бүрэн дүүрэн ашиглах боломж үүсч байгаа юм. Бидний зүгээс Улаанбаатар хотыг түгжрэлийг бууруулж, аюулгүй хурдан шуурхай үйлчилж байгаа гэж үзэж байгаа” гэв.

 Түүнийхээр бол “Риалбус” руу чиглэсэн дэд бүтэц байхгүйгээс алдагдалтай ажиллаж байгаа аж.  Гэвч үйлчилгээнд явж эхлээд олигтой орлого ч олж чадаагүй “Риалбус”-аас болж Улаанбаатар төмөр зам 28 сая төгрөгийн алдагдал хүлээгээд байгаа гэнэ.